BAKI,VOA, Orxan Qədirzadə
ABŞ Prezidenti Donald Trampın İranla şərti atəşkəs razılaşmasını elan etməsindən dərhal sonra, çərşənbə günü sübh saatlarında regionun beş ölkəsi intensiv hücumlarla üzləşib.
VOA xəbər verir ki, ABŞ və İran arasında əldə olunmuş iki həftəlik müvəqqəti atəşkəs elanından bir neçə saat sonra Birləşmiş Ərəb Əmirlikləri, Səudiyyə Ərəbistanı, Qətər, Küveyt və Bəhreyn ərazilərində partlayış səsləri eşidilib. Hücumlar nəticəsində mülki şəxslərin yaralandığı və mühüm enerji infrastrukturuna ziyan dəydiyi bildirilir.
Birləşmiş Ərəb Əmirliyində hava hücumundan müdafiə sistemləri yeni raket təhdidlərini zərərsizləşdirib. Əbu-Dabi İnformasiya Ofisinin məlumatına görə, raket qalıqlarının düşməsi nəticəsində "Habşan" qaz emalı müəssisəsində yanğın baş verib, iki BƏƏ və bir Hindistan vətəndaşı yüngül xəsarət alıb.
Küveyt Müdafiə Nazirliyi ölkənin cənubundakı neft və elektrik stansiyalarını hədəf alan 28 ədəd pilotsuz uçuş aparatının (PUA) zərərsizləşdirildiyini açıqlayıb. Hücumlar nəticəsində neft infrastrukturu və su-elektrik təminatı obyektlərinə ciddi maddi ziyan dəyib.
Səudiyyə Ərəbistanında paytaxt Ər-Riyad daxil olmaqla beş müxtəlif bölgədə həyəcan siqnalları verilib. Oxşar vəziyyət Qətər və Bəhreyndə də müşahidə olunub. Qətər Müdafiə Nazirliyi raket hücumunun dəf edildiyini, Bəhreyn rəsmiləri isə Sitra bölgəsində bəzi evlərin zərər gördüyünü təsdiqləyib.
Xatırladaq ki, Donald Tramp "Truth Social" platformasında verdiyi açıqlamada hərbi hədəflərə çatıldığını və Pakistanın vasitəçiliyi ilə İranla sülhə yaxın olduqlarını bildirmişdi. Razılaşmaya əsasən, İslamabadda 15 günlük yekun danışıqların aparılması nəzərdə tutulurdu. Lakin son hücumlar əldə olunmuş kövrək atəşkəsin icrasını ciddi sual altına qoyub.
