BAKI,VOA, Fərid Mikayılov

İran tərəfi ABŞ ilə danışıqların nəticəsindən asılı olaraq hərbi ssenarilərin mümkünlüyünü istisna etmir.

VOA xəbər verir ki, İran Ordusunun sözçüsü Muhammed Ekreminiya dövlət televiziyasında çıxışı zamanı danışıqlara ehtiyatla yanaşdıqlarını bildirib.

Məlumata görə, Ekreminiya qeyd edib ki, atəşkəs İranın mövqeyi nəticəsində qarşı tərəfə qəbul etdirilib və müzakirələrin əsasını İranın irəli sürdüyü şərtlər təşkil edir.

O vurğulayıb ki, tərəflər arasında etimad problemi qalmaqdadır və əvvəlki nüvə razılaşması dövründə əldə edilən təcrübə bu məsələdə ehtiyatlı yanaşmanı zəruri edir.

Bildirilib ki, danışıqların uğurlu nəticələnəcəyinə ümid edilsə də, uğursuzluq halında İran uzunmüddətli müharibəyə hazırdır.

Sözçü əlavə edib ki, Hörmüz boğazı üzərində nəzarətin gücləndirilməsi və keçidlərə görə ödəniş mexanizminin tətbiqi İran üçün iqtisadi üstünlük yarada bilər.