BAKI,VOA Nailə Babazadə
ABŞ Hərbi Dəniz Qüvvələri tərəfindən aprelin 19-da ələ keçirilən İrana məxsus "Touska" yük gəmisinin heyət üzvlərindən 6 nəfərinin sərbəst buraxıldığı bildirilib.
VOA xəbər verir ki, İranın rəsmi "Tasnim" xəbər agentliyinə danışan adı açıqlanmayan rəsmi nümayəndə, gəmidə olan 28 heyət üzvündən 6-sının artıq azad edilərək İrana qayıtdığını təsdiqləyib. O, yerdə qalan 22 nəfərin də sərbəst buraxılması üçün diplomatik səylərin və rəsmi cəhdlərin davam etdiyini qeyd edib.
Xatırladaq ki, ABŞ Prezidenti Donald Tramp aprelin 19-da Oman körfəzindən Hörmüz boğazına daxil olmağa çalışan İran bayraqlı "Touska" gəmisinə müdaxilə edildiyini və gəminin saxlanıldığını elan etmişdi. Bu hadisədən qısa müddət sonra İran Silahlı Qüvvələrinin ABŞ-ın bəzi hərbi gəmilərinə qarşı pilotsuz uçuş aparatları (PUA) vasitəsilə cavab zərbələri endirdiyi barədə məlumatlar yayılmışdı. Heyət üzvlərinin bir qisminin azad edilməsi bölgədə artan gərginlik fonunda diplomatik təmasların ilk nəticəsi kimi qiymətləndirilir.
