BAKI,VOA,Yusif Şərifzadə
ABŞ və İran arasında mümkün razılaşma ilə bağlı müzakirələr fonunda Arab Center Washington DC-də Fələstin–İsrail proqramının rəhbəri Yusif Munayyir Donald Trampın mümkün siyasi addımlarını dəyərləndirib.
VOA xəbər verir ki, Munayyirin sözlərinə görə, ABŞ və İran arasında razılaşma əldə olunarsa, Donald Tramp sələfi Co Baydendən fərqli yanaşma nümayiş etdirmiş olacaq.
Analitik bildirib ki, bunun əsas səbəbi xarici siyasətin yaratdığı siyasi və iqtisadi nəticələri vaxtında qiymətləndirmək və mövqeyi dəyişmək imkanıdır.
Munayyirin fikrincə, Bayden administrasiyası Qəzza zolağında baş verən hadisələr dövründə İsrailə dəyişməz dəstək göstərib və ABŞ daxilində səslənən tənqidlərə baxmayaraq siyasətində ciddi dəyişiklik etməyib.
O qeyd edib ki, Demokratlar Partiyasının seçiciləri arasında narazılığın artmasına və İsrailə dəstəyin dayandırılması çağırışlarına baxmayaraq, həmin siyasətin sonrakı mərhələdə də davam etdiyi bildirilir.
Məlumata görə, hazırda Donald Tramp ABŞ daxilində iqtisadi narazılıqlar və İranla bağlı proseslərin yaratdığı siyasi təzyiqlərlə qarşı-qarşıyadır.
Analitiklər hesab edirlər ki, mövcud vəziyyət Respublikaçılar Partiyasının qarşıdan gələn aralıq seçkilərdə mövqeyinə də təsir göstərə bilər.
