BAKI,VOA,Yusif Şərifzadə
İran hakimiyyəti ölkə daxilində bütün uçuşların müvəqqəti dayandırılması və qərb bölgəsindəki hava məkanının bağlanması barədə qərar qəbul edib.
VOA xəbər verir ki, bu barədə məlumatı İranın yarırəsmi xəbər agentliyi yayıb.
Məlumata görə, ölkə üzrə bütün daxili uçuşlar növbəti bildirişədək ləğv olunub. Eyni zamanda İranın qərb hissəsində yerləşən hava məkanı da müvəqqəti olaraq bağlanıb.
Qeyd olunur ki, məhdudiyyətlərin tətbiqi son günlər bölgədə artan hərbi gərginlik və təhlükəsizlik narahatlıqları ilə əlaqələndirilir.
Son hadisələr zamanı İranın müxtəlif şəhərlərində partlayışlar qeydə alınıb. Bunun ardınca mülki aviasiya sahəsində əlavə təhlükəsizlik tədbirlərinin həyata keçirilməsinə başlanılıb.
İran rəsmiləri daxili uçuşların nə vaxt bərpa ediləcəyi və hava məkanının nə zaman yenidən açılacağı ilə bağlı hələlik konkret tarix açıqlamayıblar.
Məsələ ilə bağlı vəziyyətin davamlı olaraq qiymətləndirildiyi və növbəti qərarların təhlükəsizlik şəraitinə uyğun veriləcəyi bildirilib.
