BAKI,VOA,Yusif Şərifzadə

İranın keçmiş ali rəhbəri Əli Xamenei ilə vida mərasiminin ölkə daxilində birlik mesajı verdiyi bildirilir. Təhlilçilər hesab edirlər ki, mərasim iqtisadi çətinliklər və ABŞ-İsrail hücumlarından sonra İran cəmiyyətini yenidən bir araya gətirə bilər.

VOA xəbər verir ki, Yaxın Şərq üzrə Strateji Araşdırmalar Mərkəzinin böyük elmi əməkdaşı Abbas Aslani bildirib ki, Tehranda və ölkənin digər şəhərlərində keçirilən mərasimlər böyük izdihamla müşahidə olunur.

Onun sözlərinə görə, Əli Xamenei dünyanın ən güclü ordularından ikisinə qarşı müdafiə siyasətinin memarı kimi təqdim olunur və bu səbəbdən ona göstərilən kütləvi ehtiram yalnız İran daxilinə deyil, ölkə hüdudlarından kənara da mesaj verir.

Təhlilçi hesab edir ki, vida mərasimi İranın ABŞ ilə danışıqlar apardığı və hələ də müharibənin təsiri altında yaşadığı bir dövrdə ölkə daxilində birliyi gücləndirə bilər.

Abbas Aslani bildirib ki, mərasim həm siyasi, həm də ictimai baxımdan İran üçün mühüm məna daşıyır.