BAKI,VOA,Yusif Şərifzadə

İran parlamentinin sədri Məhəmməd Baqir Qalibaf ABŞ-ı İrana qarşı davamlı təzyiq göstərməkdə ittiham edərək, ölkəsinin milli gücünü daha da artırmalı olduğunu bildirib.

VOA xəbər verir ki, Qalibaf sosial şəbəkə hesabında yayımladığı bəyanatda İranın milli maraqlarını və təhlükəsizliyini əsas götürərək hərəkət etməsinin vacibliyini vurğulayıb.

O bildirib ki, İranın öz gücünə arxalanmaqdan və daha da güclənməkdən başqa seçimi yoxdur.

Qalibafın sözlərinə görə, ABŞ imkan yarandığı hər vaxt İrana zərbə vurmağa və öz maraqlarını irəli aparmağa çalışır.

O qeyd edib ki, bu yanaşma yalnız müharibə, danışıqlar və ya hazırkı ABŞ Prezidenti ilə məhdudlaşmır.

Parlament sədri hesab edir ki, İranın həm müharibəyə, həm də danışıqlara münasibəti uzunmüddətli, realist yanaşmaya və milli maraqlara əsaslanmalıdır.

Qalibaf əlavə edib ki, ölkənin təhlükəsizliyinin təmin olunmasının əsas yolu daxili imkanların gücləndirilməsindən keçir.

ABŞ tərəfi Qalibafın bu açıqlamaları ilə bağlı hələlik rəsmi münasibət bildirməyib.