BAKI,VOA,Yusif Şərifzadə
İranın xarici işlər naziri Abbas Əraqçi ölkəsinin silahlı qüvvələrinin hərbi imkanlarını yüksək qiymətləndirərək müsəlman ölkələrini "xarici təhdidlərə" qarşı birliyə çağırıb.
VOA xəbər verir ki, Əraqçi bu barədə "X" sosial şəbəkəsində paylaşım edib.
Nazir bildirib ki, İran Silahlı Qüvvələri "dünyanın ən bahalı ordusuna qarşı" döyüşmək qabiliyyətini, hazırlığını və gücünü nümayiş etdirib.
O paylaşımında hansı ordunu nəzərdə tutduğunu dəqiqləşdirməyib.
Araqçi vurğulayıb ki, müsəlman ölkələri birlik nümayiş etdirdikləri təqdirdə "xarici qüvvələrin yaratdığı təhdidlərin" öhdəsindən gələ bilərlər.
"Vaxt gəlib yalnız öz gücümüzə arxalanaq və həqiqi qardaşlığı qəbul edək", – deyə İranın xarici işlər naziri qeyd edib.
Araqçinin bəyanatı İranın regionda təhlükəsizlik və əməkdaşlıq məsələləri ilə bağlı intensiv diplomatik təmaslarını davam etdirdiyi bir vaxta təsadüf edir.
