Bakı. AzerPress:
Türkiyə öz siyasi oxunu heç vaxt dəyişməyib.
AzerPress-in məlumatına görə, bu sözləri Türkiyə prezidenti Rəcəb Tayyib Ərdoğan deyib.
"Türkiyə öz siyasi oxunu heç vaxt dəyişməyib. Daxili və xarici siyasətdə hər qərarı tamamilə özümüz veririk. Azərbaycanlı qardaşlarımızla Qarabağın işğaldan azad edilməsi, Liviyanın qanuni hökumətinə dəstək , vətənimizin qorunmasında göstərdiyimiz güclü iradə bunlardan biridir. Bütün bu uğurlar ordumuzun, polisimizin, Xarici İşlər Nazirliyinin və digər qurumların, xüsusən də MİT-in səyi, mübarizəsi və zəhmətinin nəticəsidir",- deyə Ərdoğan bildirib.
Ərdoğan vurğulayıb ki, dünya Rusiya-Ukrayna müharibəsi ilə sarsıldı. Geosiyasət ön plana çıxmağa başladı. Təhlükəsizlik konsepsiyalarında da köklü dəyişikliklər baş verdi. Müdafiə xərclərini israfçı və dövlət büdcəsinə yük kimi görən dövlətlər son 1-2 ildə silahlanma yarışına giriblər. Mühafizə bölmələrinin vəzifə dairəsini daraltmaqdan danışanlar, bu gün mühafizə şuralarına qeyri-məhdud səlahiyyətlər verirlər. Keçmişdə bizi tənqid edənlər indi bizi qiymətləndirirlər. 80 faizi xarici mənbələrdən asılı olduğumuz müdafiə sənayesi, bu gün ən yüksək əlavə dəyərə malik ixraca çevrilib.
"Qarşıdakı dövrdə biz Milli Təhlükəsizlik Təşkilatımızın kadr potensialını daha da gücləndirəcəyik. Son zamanlar qeyri-qanuni miqrasiya, radikallaşma, mütəşəkkil cinayətkarlıq, ksenofobiya, islamofobiya kimi yeni təhlükələr də qurumumuzun radarına daxil olub. İsrailin ölkəmizdəki casusluq şəbəkəsini üzə çıxaran təşkilatımız, bizi təhdid edənlərə çox açıq cavab verdi”,- deyə Türkiyə prezidenti əlavə edib.
Aytac Süleymanova
Twitter: a_alieva_
