Bakı. AzerVoice:
ABŞ Konqresinin Türkiyəyə F-16 satışını təsdiqləməsi mühüm addımdır.
AzerVoice-nin məlumatına görə, bu barədə ABŞ-ın Ankaradakı səfiri Cefri Fleyk bildirib.
“ABŞ Konqresinin Türkiyənin 40 yeni və 79 modernləşdirilmiş F-16 təyyarəsi almasına razılıq verməsi irəliyə doğru atılmış mühüm addımdır. Türkiyənin F-16 donanması NATO-nun gücü üçün həyati əhəmiyyət kəsb edir və gələcəkdə müttəfiqlərin qarşılıqlı fəaliyyətini təmin edir.” - deyə səfir qeyd edib.
Məlumat üçün qeyd edək ki, yanvarın 26-da F-16-ların Türkiyəyə satışı ilə bağlı ABŞ rəhbərliyinin Konqresə göndərdiyi rəsmi bildirişin ardından qanunla müəyyən edilmiş 15 günlük araşdırma müddəti satışı dayandıracaq heç bir maneə olmadan tamamlanıb.
ABŞ Dövlət Departamentinin yanvarın 26-da Konqresə göndərdiyi rəsmi bildirişdən sonra başlayan 15 günlük araşdırma və etiraz prosesində yalnız Kentukki senatoru Rand Paulun Senata təqdim etdiyi etiraz gündəmə gətirilib.
Paulun təqdim etdiyi qanun layihəsi Senatın Xarici Əlaqələr Komitəsinə göndərilsə də, orada qanun layihəsi ilə bağlı heç bir tədbir görülməyib.
Beləliklə, ABŞ administrasiyasının rəsmi xəbərdarlığından sonra Konqresdəki 15 günlük müddət dünən axşam ABŞ vaxtı ilə başa çatdı və ABŞ Silah İxracına Nəzarət Qanununa (AECA) uyğun olaraq müvafiq qurumlar arasında satış prosesinin başlaması üçün heç bir maneə qalmayıb.
Xatırladaq ki, Türkiyə ABŞ-dan 40 yeni F-16 Block 70 döyüş təyyarəsi və inventarında olan 79 təyyarə üçün modernizasiya dəsti tələb etmişdi.
Hafiz Rufizoğlu
