Bakı. AzerVoice:
BMT-nin Ümumdünya Ərzaq Proqramı, şərait təhlükəsiz paylanmaya imkan verənə qədər Qəzzanın şimalına ərzaq yardımının paylanmasını dayandırmaq qərarına gəlib.
AzerVoice xəbər verir ki, BMT-nin qida agentliyi bu barədə bəyanat yayıb.
"Qəzza zolağının şimalına çatdırılmaların dayandırılması qərarı asanlıqla qəbul edilməyib, çünki bilirik ki, bu, orada vəziyyətin daha da pisləşməsi və daha çox insanın aclıqdan ölmə riski ilə üzləşməsi deməkdir", - deyə açıqlamada qeyd edilib.
Qeyd edək ki, oktyabrın 7-də İsrailə hücumlar olunub. Əvvəlcə Qəzza bölgəsindən reaktiv mərmilərlə kütləvi atəş açılıb, daha sonra döyüşçülər əraziyə qurudan, havadan və sudan daxil olublar.
İsrail müharibə vəziyyəti elan edib. Bundan başqa, İsrailin müdafiə naziri Yoav Qallant ehtiyatda olan hərbçilərin kütləvi çağırışını elan edib.
Oktyabrın 7-də İsrail-Fələstin münaqişəsinin yeni mərhələsi başlayandan bəri Qəzza zolağında ölənlərin sayı 29 min 195 nəfərə çatıb.
