BAKI, AzerVoice

Türkiyənin Suriyada artan nüfuzu İsrailin strateji dairələrində narahatlıq doğurur.

AzerVoice xəbər verir ki, İsrailin ALMA tədqiqat mərkəzi Türkiyənin Suriyada atdığı addımları ciddi şəkildə izlədiyini və bu prosesin İsrail üçün təhlükəli ola biləcəyini qeyd edib.

Mərkəzin 2025-ci il yanvarın 2-də yayımladığı məqalədə prezident Rəcəb Tayyib Ərdoğanın neo-Osmanlı ritorikasına diqqət çəkilərək, “Türkiyənin Suriyada üç əsas strateji hədəfi nədir?” sualı gündəmə gətirilib.

ALMA tədqiqatçılarından Yaakov Lapin və Tal Beeri qeyd edir ki, Türkiyənin məqsədləri arasında bölgədə nüfuzunu artırmaq, İslam dünyasında liderlik mövqeyini gücləndirmək və Osmanlı İmperiyasının tarixi mirasına söykənən yeni təsir zonasını bərpa etmək dayanır.

Qeyd edək ki, Suriya inqilabından sonra bir çox suriyalı Ərdoğanı dəstəkləyərək onun fotoşəkilləri ilə küçələrdə bayram ediblər. İsrail analitiklərinə görə, bu həm də Türkiyənin bölgədə ideoloji və siyasi güc kimi qəbul edilməsinin göstəricisidir.