Bakı,AzerVoice
İran Xarici İşlər Nazirliyi aprel ayında ələ keçirilən gəminin heyətinin azad edildiyini açıqlayıb. AzerVoice xəbər verir ki,bunu İranın xarici işlər naziri Hüseyn Əmir Abdullahyan Estoniya xarici işlər naziri ilə telefon danışığında bildirib.
O qeyd edib ki, İran təhlükəsizlik qüvvələri tərəfindən Hörmüz boğazında saxlanılan MCS Aries gəmisinin ekipajı sərbəst buraxılıb.
“İranın ərazi sularında radarı söndürən və naviqasiya təhlükəsizliyini təhlükə altına alan gəmi saxlanılmış və ekipajı həbs edilmişdi. İran humanist jest olaraq, bütün ekipajını azad edib və gəmiyə olan qadağanı ortadan qaldırıb”-deyə o bildirib.
Aprelin 13-də İslam İnqilabı Keşikçiləri Korpusunun (İran silahlı qüvvələrinin elit bölməsi) xüsusi təyinatlıları Portuqaliya bayrağı altında üzən MCS Aries konteyner gəmisini ələ keçirib. Gəmi israilli iş adamı Eyal Oferin Zodiac Group ilə əlaqəli idi. Hadisə İsrailin İran səfirliyi kompleksinin yerləşdiyi Dəməşqdəki diplomatik məhəlləyə endirdiyi zərbə nəticəsində İsrail və İran arasında münasibətlərin gərginləşməsi fonunda baş verib.
