BAKI, AzerVoice
TEKNOFEST KKTC ilk günündə 62 min ziyarətçini cəlb edib.
AzerVoice xəbər verir ki, Şimali Kipr Türk Cümhuriyyətində (KKTC) keçirilən TEKNOFEST aviasiya, kosmos və texnologiya festivalı ilk günündə 62 min insan tərəfindən ziyarət olunub.
Dünyanın ən böyük texnologiya festivallarından biri olan TEKNOFEST, bu il KKTC Prezidentliyinin himayəsi altında, Türk Texnologiya Komandası Vəqfi və Türkiyənin Sənaye və Texnologiya Nazirliyinin təşkilatçılığı ilə köhnə Ercan Hava Limanında reallaşır. Tədbirdə 132 qurum iştirak edir.
Festivalda 116 stenddə texnologiyaya dair fəaliyyətlər, elmi təcrübələr və təqdimatlar iştirakçılara təqdim olunur. Ziyarətçilər üçün milli təyyarələrin uçuş nümayişləri, seminarlar, yarmarka sahələri, planetarium filmləri, kosmos sərgisi, XR və simulyasiya təcrübələri, eləcə də Kipr Sülh Əməliyyatı və Türk Müqavimət Təşkilatına dair sərgilər təşkil edilib.
Festival mayın 4-dək davam edəcək və giriş tamamilə pulsuzdur. Ziyarət üçün TEKNOFEST-in rəsmi internet saytında qeydiyyat tələb olunur, lakin 7 yaşdan kiçik uşaqlar qeydiyyatsız daxil ola bilərlər. Festival ərazisinə hər gün saat 09:00-dan 19:00-a qədər giriş mümkündür.
