BAKI, AzerVoice

Türkiyə Xarici İşlər Nazirliyi İsrailin Suriyaya hücumlarını qətiyyətlə pisləyib.

AzerVoice xəbər verir ki, Türkiyə Xarici İşlər Nazirliyi İsrailin Suriyanın cənubuna və paytaxt Dəməşqə endirdiyi hücumları sərt şəkildə qınayıb.
Nazirlik bəyan edib ki, bu hücumlar Suriyada sülh, sabitlik və təhlükəsizlik səylərinə qarşı təxribat xarakteri daşıyır.

“İsrailin Dəməşqin mərkəzinə, o cümlədən Prezident Sarayı və Baş Qərargah qərargahını hədəfə alması Suriyanın sabitliyə doğru atdığı addımlara qarşı bir sabotaj cəhdidir. Suriya xalqı sülh içində yaşamaq və dünya ilə inteqrasiya etmək üçün tarixi fürsət qarşısındadır. Bu prosesi dəstəkləyən bütün tərəflər Suriya administrasiyasının bu istiqamətdə atdığı addımlara töhfə verməlidir”. - deyə bəyanatda qeyd olunub.

İsrailin hücumlarına münasibət bildirən AK Partiya sədr müavini və sözçüsü Ömər Çelik də məsələ ilə bağlı mövqeyini açıqlayıb. Sosial media üzərindən paylaşım edən Çelik,

“İsrailin Suriyaya qarşı həyata keçirdiyi hücumları şiddətlə qınayırıq. Bu hücumlar yalnız Suriyanın deyil, bütövlükdə regionun və dünyanın təhlükəsizliyi üçün ciddi təhdid təşkil edir. Suriyanın suverenliyi və ərazi bütövlüyünü dəstəkləməyə davam edəcəyik”- deyə qeyd edib.

Qeyd edək ki, İsrail mediası İsrail ordusunun Dəməşqdə Prezident Sarayı və Baş Qərargah binasını hədəfə aldığını bildirib. Hücumun miqyası və nəticələri ilə bağlı rəsmi təsdiq hələlik verilməyib.