BAKI,AzerVoice, Orxan Qədirzadə
Türkiyə Prezidenti Rəcəb Tayyib Ərdoğan Cənubi Koreya Prezidenti Li Cae Myonqla görüşdən sonra keçirilən birgə mətbuat konfransında iki ölkə arasında strateji əməkdaşlığın genişləndirilməsi istiqamətində müzakirələrin aparıldığını bildirib.
AzerVoice xəbər verir ki, Ərdoğanın sözlərinə görə, Ankara və Seul müdafiə sənayesi üzrə birgə layihələr, eləcə də Türkiyədə atom elektrik stansiyasının tikintisi ilə bağlı danışıqları davam etdirir. Prezident qeyd edib ki, aidiyyəti dövlət qurumları arasında proses aktiv şəkildə irəliləyir.
Dövlət başçısı həmçinin bildirib ki, tərəflər beynəlxalq gündəmdəki əsas məsələləri – Qəzza zolağında atəşkəsin uzadılması, mülki vətəndaşların qorunması və iki dövlət əsasında həll modelinin dəstəklənməsi kimi mövzuları müzakirə ediblər.
Ərdoğan vurğulayıb ki, Türkiyə Ukraynada davamlı sülhün əldə olunması üçün İstanbul prosesinə dəstəyini davam etdirəcək.
Prezident əlavə edib ki, Türkiyə və Cənubi Koreya Suriya, Qəzza, Ukraynanın bərpası, İraq, Afrika və Mərkəzi Asiya kimi müxtəlif regionlarda əməkdaşlıq imkanlarına malikdir və bu sahələrdə qarşılıqlı fəaliyyətin genişləndirilməsi gündəmdədir.
