BAKI,AzerVoice
İsrail Qəzzaya heç bir humanitar yardımın daxil olmasına icazə verməyəcək, məqsəd isə HƏMAS-a təzyiq göstərməkdir.
AzerVoice xəbər verir ki, bu sözləri İsrailin müdafiə naziri Yisrael Katz deyib.
Bu bəyanat Qəzzada atəşkəslə bağlı İsrailin təqdim etdiyi təklif üzərində davam edən danışıqlar fonunda verilib.
Kats bəyanatında bildirib ki, İsrailin Qəzza siyasəti hər şeydən öncə, bütün girovların azad olunması üçün mümkün olan hər cür səylərin göstərilməsini təmin etmək, bu məqsədlə razılaşma çərçivəsində danışıqları aparmaq və gələcəkdə HƏMAS-ın məğlubiyyətinə doğru körpü salmaqdan ibarətdir.
O əlavə edib ki, bu siyasət həm də HƏMAS-ın Qəzza əhalisi üzərindəki nəzarətini zəiflətmək üçün humanitar yardımın dayandırılmasını, gələcəkdə isə yardımların mülki şirkətlər vasitəsilə paylanmasını təmin edəcək infrastrukturun yaradılmasını əhatə edir.
Digər tərəfdən, İsrailin milli təhlükəsizlik naziri İtamar Ben Qvir müdafiə naziri Yisrael Katzın humanitar yardımı mülki şirkətlər vasitəsilə Qəzzaya daxil etmək planını sərt şəkildə tənqid edib.
“HƏMAS təslim olmadan yardımların bərpası yanlış qərardır. Bizim girovlarımız azad edilməyincə, Qəzzaya bir dənə belə ərzaq məhsulu daxil olmamalıdır”- deyə o bildirib.
