BAKI, AzerVoice
İsrailin Qəzza zolağında apardığı aclıq və soyqırım müharibəsi fonunda atəşkəs danışıqlarının heç bir mənası yoxdur.
AzerVoice xəbər verir ki, HƏMAS beynəlxalq ictimaiyyəti İsrailə təzyiq göstərməyə və Qəzzada aclıq cinayətini dayandırmağa çağırıb.
“İsrail ilə dolayı danışıqların və ya yeni atəşkəs təkliflərinin heç bir mənası yoxdur. Çünki Qəzzada xalqımıza qarşı aclıq və soyqırım müharibəsi aparılır. Beynəlxalq ictimaiyyət Netanyahu hökumətinə təzyiq göstərərək aclıq, susuzluq və qtliam siyasətini dayandırmalıdır”- deyə HƏMAS-ın Siyasi Bürosunun üzvü Bəsim Nəim bildirib.
Xatırladaq ki, İsrail 18 mart tarixində HƏMAS-la atəşkəsi ləğv etdikdən sonra Qəzza zolağında bir sıra bölgələri hava hücumuna məruz qoyub. Bu hücumlar nəticəsində yüzlərlə fələstinli həlak olub. Eyni zamanda, İsrail bölgəyə humanitar yardım girişini tamamilə dayandırıb. Hazırda əhalinin un, yanacaq və tibbi ləvazimat ehtiyatları kritik həddə çatıb.
Digər tərəfdən, İsrail ordusunun sözçüsü Efi Deyfrin bildirib ki, HƏMAS razılaşmanı qəbul etməsə də, ordu yeni hərbi mərhələyə keçməyə hazırlaşır.
“Əlimizdə sistemli plan var. "Gideon Arabaları" əməliyyatı ilə həm əsirlərimizin geri qaytarılmasına, həm də HƏMAS hakimiyyətinin devrilməsinə yönəlmiş intensiv əməliyyat mərhələsinə keçid edəcəyik” – deyə Deyfrin bildirib.
