BAKI, AzerVoice
İran Xarici İşlər Naziri Seyid Abbas Araqçi, ABŞ-ın BMT Təhlükəsizlik Şurasının daimi üzvü olduğunu xatırladaraq, Vaşinqtonun İranın nüvə obyektlərinə hücum edərək BMT Nizamnaməsini, beynəlxalq hüququ və Nüvə Silahlarının Yayılmasının Qarşısının Alınması üzrə Müqaviləni (NPT) pozduğunu bildirib.
AzerVoice xəbər verir ki, bu barədə Araqçinin verdiyi açıqlamada deyilir.
"Bu səhər baş verənlər qəbuledilməzdir və qalıcı nəticələrə səbəb olacaq. BMT-nin hər bir üzvü bu cinayətə qarşı diqqətli olmalıdır" - deyə, Araqçi vurğulayıb.
O həmçinin bildirib ki, Tehran BMT Nizamnaməsi və qanuni müdafiə hüququna əsaslanaraq suverenliyini, maraqlarını və xalqını qorumaq üçün bütün variantları açıq saxlayır.
Araqçi, həmçinin Avropa İttifaqının (Aİ) xarici siyasət üzrə ali nümayəndəsi Kaya Kallas və Böyük Britaniyanın baş naziri Kir Starmerin Tehranın danışıqlar masasına qayıtmağına dair çağırışlarına cavab olaraq açıqlama verib.
“Böyük Britaniya və Aİ-nin nümayəndələrinə görə danışıqlar masasına qayıtmalı olan tərəf İrandır. İran heç vaxt tərk etmədiyi danışıqlar masasına necə geri qayıda bilər? Halbuki o yer artıq məhv edilib” - deyə, o bildirib.
Qeyd edək ki, ABŞ Prezidenti Donald Tramp iyunun 22-ə keçən gecə ölkəsinin Hərbi Hava Qüvvələrinin İran ərazisində üç nüvə obyektinə – Fordo, Natanz və İsfahana qarşı uğurlu hücum həyata keçirdiyini açıqlamışdı. O, həmçinin İranı İsrail ilə münaqişəni dayandırmağa çağırmışdı.
