Bakı. AzerVoice
ABŞ Senatının üzvü Dik Durbin Qəzzada humanitar vəziyyəti “dəhşətli və qəddar” kimi qiymətləndirib və İsraildən bölgəyə yardımın çatdırılmasına icazə verməsini tələb edib.
AzerVoicexəbər verir ki, bu barədə Senator Durbin Senatdakı çıxışında bildirib.
Çıxışında "Qəzzada İsrailin iki illik hərbi əməliyyatları nəticəsində yaranan aclıq və böhran günü-gündən daha da ağırlaşır. Qəzzadan qayıdan britaniyalı həkim isə İsrailin tətbiq etdiyi aclığın "dəqiqə-dəqiqə daha da pisləşdiyini"- deyə o qeyd edib.
Durbinin sözlərinə görə, kütləvi aclıq səbəbindən Qəzza xəstəxanalarında körpələr həyat uğrunda mübarizə aparır. O, İsrailin baş naziri Binyamin Netanyahudan Qəzza zolağına humanitar yardımın dərhal çatdırılması üçün icazə verməsini tələb edib.
Digər tərəfdən, ABŞ Nümayəndələr Palatasının Respublikaçı üzvü Marjorie Taylor Greene də sosial mediada Qəzzadakı aclıq və insan haqları böhranını sərt şəkildə pisləyib. O, İsrailin Qəzzada yaratdığı vəziyyəti “dəhşətli” adlandıraraq, humanitar böhranın dərhal sona çatmasını tələb edib.
Greene həmçinin ABŞ-ın İsrail, İordaniya və digər ölkələrə maliyyə yardımlarının azaldılması təkliflərinin Konqresdə uğursuz olduğunu bildirib. O, İsrailin raketdən müdafiə sisteminə ayrılan 500 milyon dollarlıq maliyyənin ləğvi ilə bağlı təklifin iyulun 18-də Konqresdə 422 əleyhinə, 6 lehinə səs ilə rədd edildiyini xatırladıb.
İsrailin ağır hücumları və sərt blokadası altında olan Qəzza zolağında su, qida, dərman, tibbi ləvazimat və gigiyena vasitələrinin çatışmazlığı insanları aclıq və xəstəliklə mübarizəyə məcbur edir. Oktyabrın 7-dən bəri təxminən 147 nəfər aclıqdan dünyasını dəyişib.
Beynəlxalq təşkilatlar və insan haqları qrupları İsrailin aclıq və susuzluqdan silah kimi istifadə etdiyini bildirir. Hərbi əməliyyatlar nəticəsində Qəzzanın 88 faizi dağıdılıb və təxminən 2 milyon insan evlərini itirərək müvəqqəti sığınacaqlarda ağır şəraitdə yaşamağa məcbur olub.
İsrail ordusunun mülki sığınacaqlara və köçkünlərin çadırlarına etdiyi hücumlar nəticəsində vəziyyət daha da ağırlaşır. Məcburi köçkünlər qeyri-sağlam şəraitdə, yoluxucu xəstəliklərin artdığı məktəblərdə və çadırlarda həyatlarını davam etdirməyə çalışırlar.
Qeyd edək ki, 2023-cü ilin oktyabr ayından bəri İsrailin Qəzza zolağına hücumları nəticəsində ən azı 59,821 fələstinli həyatını itirib, 144,851 nəfər isə yaralanıb.
