BAKI, AzerVoice
17 ərəb ölkəsi BMT konfransından sonra HƏMAS-a silahı yerə qoymaq və Qəzzadakı nəzarəti Fələstin Muxtariyyətinə vermək çağırışı edib.
AzerVoice xəbər verir ki, BMT-nin himayəsi altında keçirilən beynəlxalq konfransdan sonra Qətər, Səudiyyə Ərəbistanı, Misir və digər ölkələr daxil olmaqla 17 ərəb dövləti birgə bəyannamə imzalayıb.
Bəyannamədə HƏMAS-a Qəzzada silahlı fəaliyyətlərinə son qoymaq, nəzarəti Fələstinə təhvil vermək və bölgədə daimi həllə imkan yaratmaq çağırışı edilib.
Sənəddə “Qəzzada müharibənin sona çatması üçün HƏMAS öz hökumətini tərk etməli və silahlarını Fələstin Muxtariyyətinə təhvil verməlidir”- deyə qeyd edilib.
Eyni zamanda, münaqişədən sonrakı mərhələdə Qəzzaya müvəqqəti beynəlxalq sabitləşdirmə missiyasının göndərilməsi təklifi də irəli sürülüb. Missiyanın BMT Təhlükəsizlik Şurasının razılığı və Fələstin Administrasiyasının dəvəti ilə fəaliyyət göstərəcəyi bildirilir.
Xatırladaq ki, HƏMAS-ın bəzi nümayəndələri bu ayın əvvəlində Səudiyyə Ərəbistanı mətbuatına bildiriblər ki, atəşkəs razılaşması çərçivəsində silahların təhvil verilməsi məsələsini nəzərdən keçirməyə açıq ola bilərlər.
Bu çağırışın bölgədə uzunmüddətli sabitliyə töhfə verib-verməyəcəyi yaxın həftələrdə baş tutacaq siyasi danışıqlardan asılı olacaq.
