BAKI, AzerVoice, Səməd Əyyubov
Beynəlxalq Atom Enerjisi Agentliyinin (BAEA) nümayəndələri yaxın günlərdə İrana edəcəkləri səfər zamanı ölkənin nüvə obyektlərinə baxış keçirə bilməyəcəklər.
AzerVoice xəbər verir ki, bu barədə İran Parlamentinin (Məclis) milli təhlükəsizlik və xarici siyasət komissiyasının sədri İbrahim Əzizi məlumat verib.
O bildirib ki, Məclis tərəfindən qəbul edilmiş qanunlara əsasən, BAEA nümayəndələrinə və digər xarici inspektorlara İranın nüvə obyektlərinə heç bir halda fiziki giriş icazəsi verilməyəcək. Əzizi əlavə edib ki, agentlik nümayəndələri yalnız İran rəsmiləri ilə texniki məsləhətləşmələr aparmaq səlahiyyətinə malikdir.
Qeyd edək ki, avqustun 4-də İran Xarici İşlər Nazirliyinin rəsmi nümayəndəsi İsmayıl Bəqai BAEA nümayəndə heyətinin 10 gün ərzində İrana səfər edəcəyini açıqlamışdı.
Xatırladaq ki, iyunun 13-nə keçən gecə İsrail İrana qarşı hərbi əməliyyata başlayıb. Bir sutkadan az müddət sonra İran cavab hücumu həyata keçirib. ABŞ isə gərginliyin artmasından doqquz gün sonra münaqişəyə qoşularaq Fordo, Nətənz və İsfahan nüvə obyektlərinə zərbələr endirib. İyun ayının 23-ü axşam saatlarında İran Qətərdə yerləşən, ABŞ-ın Yaxın Şərqdə ən böyük hərbi bazası olan Əl-Udeydə hücum edib. Daha sonra ABŞ Prezidenti Donald Tramp İsrail və İranın atəşkəs rejimi elan etməyə razılıq verdiyini bildirib. Atəşkəs iyunun 24-dən qüvvəyə minib.
İsrail və ABŞ-ın İranın nüvə obyektlərinə endirdiyi zərbələrin BAEA tərəfindən pislənməməsi ölkə daxilində sərt tənqidlərə səbəb olub və agentlik rəhbərliyi fəaliyyətini siyasiləşdirməkdə ittiham edilib. İyulun 2-də İran Prezidenti Məsud Pezeşkian BAEA ilə əməkdaşlığın dayandırılması haqqında qanun imzalayıb. İyulun 22-də isə İran xarici işlər naziri Abbas Əraqçi gələcəkdə agentlik inspektorlarının ölkəyə qayıtma ehtimalını istisna etmədiyini bəyan edib.
