BAKI, AzerVoice, Səməd Əyyubov
İsrailin Baş naziri Benyamin Netanyahu təhlükəsizlik məsələlərinə həsr olunmuş kiçik tərkibli müşavirə keçirib.
AzerVoice xəbər verir ki, Baş nazirin ofisinin verdiyi məlumata görə, təxminən üç saat davam edən iclasda əsas müzakirə mövzusu Qəzza zolağındakı vəziyyət olub.
Məlumatda bildirilib ki, İsrail Ordusunun Baş Qərargah rəisi Eyal Zamir Qəzzada atılacaq növbəti addımlar üçün bir neçə variant təqdim edib. Qeyd olunub ki, İsrail Müdafiə Ordusu Hərbi-Siyasi Kabinetin qəbul edəcəyi istənilən qərarı icra etməyə hazırdır.
Bundan əvvəl İsrailin "Ynet" portalı mənbəyə istinadən xəbər vermişdi ki, siyasi rəhbərlik Qəzza zolağının tam işğalı barədə qərar verməyə yaxındır. Mənbələrdən birinin sözlərinə görə, artıq qərar qəbul olunub və İsrail tərəfi girovların azad edilməsi üzrə danışıqların dalana dirəndiyini düşünərək hərbi müdaxiləni yeganə çıxış yolu kimi görür.
Lakin, ölkənin hərbi rəhbərliyi, o cümlədən Baş Qərargah rəisi Eyal Zamir, bu addıma qarşı çıxıb.
