BAKI, AzerVoice, Səməd Əyyubov
Qətər və Misir Qəzza zolağındakı münaqişənin həlli üçün vasitəçilik səylərini davam etdirir, lakin HƏMAS bu səylərin nəticələri barədə məlumat almayıb.
AzerVoice xəbər verir ki, bu barədə hərəkatın siyasi büro üzvü Usamə Həmdan "Al Araby" telekanalına müsahibəsində bildirib.
Onun sözlərinə görə, Dohada keçirilən son danışıqlar raundunda tərəfləri qane edəcək razılaşmaya demək olar ki, nail olunmuşdu, lakin ABŞ-ın xüsusi elçisi Stiven Uitkoffun açıqlamaları bütün prosesi pozdu. Həmdan qeyd edib ki, Qətər və Misirdəki vasitəçilər səylərini dayandırmayıblar, amma indiyədək bu səylərin nəzərəçarpacaq nəticəsi olmayıb və HƏMAS rəsmi olaraq heç bir nəticə barədə məlumatlandırılmayıb.
Qəzza zolağında hərtərəfli razılaşma imkanı barədə danışan Həmdan bildirib ki, HƏMAS bir ildən çox əvvəl İsrailin aqressiyasının dayandırılmasını, bütün İsrail qüvvələrinin çıxarılmasını, zolağın bütün sərhəd-keçid məntəqələrinin açılmasını, Qəzzanın bərpasını və girovların fələstinli məhbuslarla dəyişdirilməsini nəzərdə tutan təklif təqdim edib. Onun sözlərinə görə, İsrail bu təklifi qəbul etməyib və mərhələli razılaşma təklif edərək sonradan onu da pozub. Həmdan vurğulayıb ki, əgər təqdim olunacaq hərtərəfli həll yuxarıda sadalanan şərtləri özündə əks etdirərsə, HƏMAS bunu müsbət qarşılayacaq.
Xatırladaq ki, iyulun 6-da HƏMAS və İsrail Misir, Qətər və ABŞ-ın vasitəçiliyi ilə Dohada atəşkəs və Qəzzada saxlanılan israilli girovların azad edilməsi üzrə razılaşmaya nail olmaq məqsədilə danışıqlara yenidən başlayıblar. İyulun 24-də İsrailin baş naziri Benyamin Netanyahu HƏMAS-ın son atəşkəs təklifinə cavabı ilə bağlı İsrail nümayəndə heyətini Dohadan geri çağırıb. ABŞ-ın xüsusi elçisi Stiven Uitkoff isə bildirib ki, HƏMAS-ın cavabı Qəzzada atəşkəsə nail olmaq istəyi olmadığını açıq göstərdiyi üçün ABŞ da nümayəndələrini məsləhətləşmələr üçün Dohadan geri çağırıb. HƏMAS bu qiymətləndirmə ilə razılaşmayaraq vasitəçilərin cavabı “konstruktiv” adlandırdıqlarını bildirib. İyulun sonunda isə HƏMAS lideri Xəlil əl-Həyyə blokada davam edərkən İsraillə danışıqları mənasız adlandırıb.
