BAKI, AzerVoice, Səməd Əyyubov
İsrailin baş naziri Benyamin Netanyahu Qəzza zolağında ölkəsinin təhlükəsizliyini və qələbəsini təmin edəcək “beş əsas prinsipi” açıqlayıb.
AzerVoice-un məlumatına görə, Netanyahu bildirib ki, bu prinsiplər HƏMAS-ın tam şəkildə silahsızlaşdırılması, bütün girovların azad edilməsi, Qəzza zolağının tam demilitarizasiyası, təhlükəsizliyin (o cümlədən mühafizə perimetri ilə birlikdə) İsrailin nəzarətində olması və nə HƏMAS-ın, nə də Fələstin Milli Administrasiyasının idarə etmədiyi alternativ mülki idarəetmənin yaradılmasını nəzərdə tutur.
Baş nazir əlavə edib ki, İsrail bu prinsiplərin həyata keçirilməsi üçün fəaliyyətini davam etdirir və artıq hər kəsin bunun vacibliyini anlamasının vaxtı çatdığını vurğulayıb. O həmçinin xatırladıb ki, hökumət bir həftə əvvəl müharibəni sona çatdıracaq bu “beş əsas prinsipi” təsdiqləyib.
Bu arada, Netanyahu daha əvvəl, işğal altındakı Fələstin torpaqlarını da əhatə edən “Böyük İsrail” planına sadiq olduğunu bəyan edib və bunu “tarixi və mənəvi missiya” adlandırıb.
“Böyük İsrail” anlayışı bəzi sionistlər, o cümlədən Sionist Revizionist hərəkatının qurucusu və hakim “Likud” partiyasının ideya müəllifi hesab edilən Zeev Jabotinski tərəfindən müasir İsrail dövləti ilə yanaşı, Qəzza zolağı, İordan çayının qərb sahili və İordaniyanın müəyyən ərazilərini əhatə edən konsepsiya kimi istifadə olunur.
