BAKI, AzerVoice, Fərid Mikayılov
İsrailin Baş naziri Benyamin Netanyahu Livan hökumətinin bu ayın əvvəlində 2025-ci ilin sonuna qədər Hizbullahı silahsızlaşdırmaq barədə qəbul etdiyi qərarı “tarixi addım” kimi dəyərləndirib.
AzerVoice xəbər verir ki, Netanyahu bildirib ki, əgər Livan bu istiqamətdə konkret addımlar atarsa, İsrail də qarşılıqlı tədbirlər görərək Cənubi Livandakı hərbi varlığını mərhələli şəkildə azalda bilər.
“Hizbullah silahları yerə qoyarsa, İsrail də üzərinə düşən öhdəlikləri yerinə yetirəcək”- deyə Netanyahu vurğulayıb.
Xatırladaq ki, ötən ilin noyabrında ABŞ-ın vasitəçiliyi ilə əldə olunan atəşkəslə başa çatan İsrail–Hizbullah müharibəsindən sonra Beyrut ABŞ-ın təzyiqi altında qalıb.
Hizbullah rəhbərliyi isə silahsızlaşdırma məsələsini yalnız İsrailin Livanın daxilində nəzarətdə saxladığı beş təpədən çəkilməsindən və gündəlik hava hücumlarını dayandırmasından sonra müzakirə edəcəklərini açıqlayıb.
ABŞ-ın təzyiqi ilə Livan hökuməti silahsızlaşdırma planı üzərində işləsə də, Hizbullah 14 ay davam edən müharibədə ağır itkilərə məruz qalıb və həm siyasi, həm də hərbi rəhbərliyinin bir çox üzvünü itirib.
