BAKI, AzerVoice, Səməd Əyyubov
İsrail işğal altında saxladığı ərazilərdən qoşunlarını çıxarmalıdır ki, Livan ordusu cənub sərhədində tam yerləşmə prosesini başa çatdıra bilsin.
AzerVoice xəbər verir ki, bunu ölkə prezidenti Cozef Aun Beyrutda ABŞ Silahlı Qüvvələrinin Mərkəzi Komandanlığının (CENTCOM) rəhbəri admiral Bred Kuperlə görüşündə bildirib.
Prezident Administrasiyasının yaydığı açıqlamada Aunun sözlərinə istinadən bildirilib ki, “Livan hərbçiləri hazırda Litani çayından cənubdakı ərazilərin 85 faizinə nəzarət edir. Lakin beynəlxalq səviyyədə tanınmış sərhəddə yerləşməyə İsrail mane olur və aqressiv hücumlarını davam etdirir.”
Aun ABŞ-ı İsrailə təzyiq göstərməyə və 2024-cü il noyabrın 27-də imzalanmış atəşkəs sazişinin şərtlərinin icrasını təmin etməyə çağırıb. Bu şərtlərə hərbi əməliyyatların dayandırılması, Livanın cənubundakı beş işğal olunmuş yüksəklikdən qoşunların çıxarılması və əsirlərin qaytarılması daxildir.
Prezident əlavə edib ki, bu addımlar avqustun 5-də Livan hökuməti tərəfindən qəbul edilən qərarın – silahlı qruplaşmalarda, o cümlədən Hizbullahda olan bütün silahların orduya təhvil verilməsi prosesinin icrasına imkan yaradacaq.
Aun həmçinin Livan ordusunun gücləndirilməsinin, ona lazımi texnika və avadanlıq verilməsinin ölkə ərazisində qarşıya qoyulan vəzifələrin uğurla yerinə yetirilməsi üçün vacibliyini vurğulayıb.
Onun sözlərinə görə, hərbçilər “çətin coğrafi və əməliyyat şəraitində” fəaliyyət göstərirlər. Prezident bildirib ki, ilin əvvəlindən bəri silahların müsadirəsi, sursatların daşınması, minaların zərərsizləşdirilməsi və digər əməliyyatlar zamanı 12 zabit və əsgər həlak olub.
