BAKI, AzerVoice – Belçikanın paytaxtı Brüsseldə bazar günü on minlərlə insan Fələstin xalqına dəstək üçün küçələrə çıxıb. Polis nümayişçilərin sayını təxminən 70 min olaraq açıqlasa da, təşkilatçılar iştirakçıların sayının 120 minə çatdığını bildiriblər.
Etirazçılar qırmızı kartlar və “soyqırımın dayandırılması” şüarlarının yazıldığı plakatlar qaldıraraq, İsrailə qarşı əlavə tədbirlər görülməsini və fələstinli mülki əhalinin müdafiə olunmasını tələb ediblər.
Belçika-Fələstin Assosiasiyasının sözçüsü Qriqori Mozye də mövcud tədbirlərin kifayət etmədiyini qeyd edib.
“Davam edən soyqırım fonunda indiyə qədər atılan addımlar gözlənilən səviyyədə deyil.”-deyə o bildirib.
Belçikanın xarici işlər naziri Maksim Privo isə bir neçə gün əvvəl verdiyi açıqlamada Avropa İttifaqının Qəzza məsələsində “öz məsuliyyətinin öhdəsindən gələ bilmədiyini” bildirib. Onun sözlərinə görə, ittifaqın xarici siyasətdəki etibarı sürətlə zəifləyir.
Nazir əlavə edib ki, Aİ ölkələri arasında ciddi parçalanma var və üzv dövlətlər aylarla İsrailə qarşı sanksiyalar tətbiqi barədə razılığa gələ bilməyiblər.
BMT avqustun sonunda Qəzzada aclığın olduğunu rəsmən elan edib. Bu, İsrailin humanitar yardımlara davamlı məhdudiyyətlər qoyması fonunda baş verib.
Belçika isə cavab olaraq İsrailə və Baş nazir Benyamin Netanyahunun hökumətindəki iki ifrat sağçı nazirə qarşı iqtisadi və konsulluq məhdudiyyətlərini əhatə edən sanksiyalar tətbiq edib. Rəsmi Brüssel həmçinin Fransa da daxil olmaqla bir sıra ölkələrlə birlikdə bu ay Nyu-Yorkda keçiriləcək BMT Baş Assambleyası çərçivəsində Fələstini dövlət kimi tanıyacağını açıqlayıb.
