BAKI, AzerVoice, Nailə Babazadə
İsrail ordusunun 7 oktyabr 2023-cü ildən bəri Qəzza zolağına həyata keçirdiyi hücumlarda həyatını itirənlərin sayı son 24 saatda 37 nəfər artaraq 65 min 174-ə çatıb.
AzerVoice xəbər verir ki, Qəzzadakı Səhiyyə Nazirliyinin yaydığı yazılı açıqlamada, İsrailin davam edən hücumları və aclıq səbəbindən həyatını itirənlərlə bağlı son məlumatlar paylaşılıb.
Son 24 saat ərzində Qəzza zolağındakı xəstəxanalara 33 meyit və 146 yaralı gətirildiyi bildirilib.
İsrail ordusunun 19 yanvarda əldə edilən atəşkəsi pozaraq 18 martdan bəri həyata keçirdiyi hücumlarda 12 min 622 fələstinlinin həyatını itirdiyi, 54 min 30 nəfərin isə yaralandığı qeyd edilib.
İsrail-ABŞ rəhbərliyindəki saxta humanitar yardım bölgələrində fələstinlilərin hədəf alındığı sistemli hücumlarda 27 maydan bəri ölənlərin sayının 2 min 514-ə, yaralananların isə 18 min 431-ə çatdığı bildirilib.
İsrailin 7 oktyabr 2023-cü ildən bəri Qəzza zolağına həyata keçirdiyi hücumlarda ümumi ölənlərin sayı 65 min 174 nəfər, yaralananların sayı isə 166 min 71 nəfər olaraq açıqlanıb.
Qəzza zolağında dağıntılar altında hələ də minlərlə meyitin qaldığı bildirilir.
İsrailin sərhəd keçidlərini bağlaması və humanitar yardımların qarşısını alması nəticəsində aclığa sürüklənən Qəzza zolağında son 24 saat ərzində biri uşaq olmaqla 4 fələstinlinin daha aclıq və qidalanma çatışmazlığı səbəbindən həyatını itirdiyi qeyd olunub.
7 oktyabr 2023-cü ildən bəri Qəzza zolağında aclıq səbəbindən həyatını itirənlərin sayının 147-si uşaq olmaqla 440 nəfərə çatdığı bildirilib.
Birləşmiş Millətlər Təşkilatının dəstəklədiyi İnteqrə edilmiş Qida Təhlükəsizliyi Faza Təsnifatı (IPC) tərəfindən 22 avqustda Qəzza şəhərində rəsmi şəkildə "qıtlıq" elan edildiyi və həmin tarixdən bəri 32-si uşaq olmaqla 162 nəfərin daha aclıq və qidalanma çatışmazlığı səbəbindən həyatını itirdiyi bildirilib.
IPC, sentyabr ayının sonuna qədər qıtlığın Qəzza zolağının Deyr əl-Bəlah və Xan Yunis şəhərlərinə də yayıla biləcəyini bəyan etmişdi.
