BAKI, AzerVoice
Səudiyyə Ərəbistanının vəliəhdi, baş nazir Məhəmməd bin Salman və Fransa prezidenti Emmanuel Makron telefon danışığı zamanı Fələstin məsələsinin sülh yolu ilə həllinə dair keçirilən beynəlxalq yüksək səviyyəli konfransın nəticələrini müzakirə ediblər.
AzerVoice xəbər verir ki, dünən axşam ssatlarında baş tutan danışıq zamanı tərəflər, Səudiyyə ilə Fransanın birgə rəhbərliyi altında keçirilən və “iki dövlətli həll” prinsipinin icrasına həsr olunan konfransın əhəmiyyətini vurğulayıblar. Həmçinin, 22 sentyabr 2025-ci ildə liderlər səviyyəsində davam etdiriləcək görüş üçün koordinasiya məsələləri razılaşdırılıb. Bu addım Qəzzada müharibənin dayandırılması və Fələstin dövlətinin yaradılması istiqamətində beynəlxalq səylərə dəstək məqsədi daşıyır.
Danışıq zamanı həm Məhəmməd bin Salman, həm də Emmanuel Makron BMT Baş Assambleyasının Nyu-York Bəyanatını böyük səs çoxluğu ilə qəbul etməsini alqışlayıblar.
Tərəflər, həmçinin, bir çox dövlətlərin Fələstini tanımaq niyyətini bəyan etməsinin beynəlxalq ictimaiyyətin sülhə və müstəqil Fələstin dövlətinin yaradılmasına artan dəstəyini göstərdiyini bildiriblər.
