BAKI, AzerVoice, Fərid Mikayılov
Suriya Prezidenti Əhməd əş-Şəraa BMT Baş Assambleyasının 80-ci sessiyasında çıxış edərək, ölkəsinin regionda “sülh və firavanlıq məkanı”na çevrildiyini bildirib və beynəlxalq ictimaiyyəti Dəməşqə qarşı bütün sanksiyaları ləğv etməyə çağırıb.
AzerVoice xəbər verir ki, Əş-Şəraa qeyd edib ki, əvvəlki hakimiyyət dövründə təxminən bir milyon insan öldürülüb, iki milyon ev dağıdılıb və vətəndaşlara qarşı “ən dəhşətli işgəncə üsullarından” istifadə olunub.
O, günahkarların ədalət mühakiməsinə cəlb ediləcəyini və ölkədə milli birliyi pozmağa yönələn məzhəbçilik cəhdlərinin uğursuzluğa düçar olduğunu vurğulayıb.
Əş-Şəraa bildirib ki, sanksiyalar sadə suriyalıların həyatını iflic vəziyyətinə salır.
“Biz diplomatiya və sabitlik siyasəti qəbul etmişik, 1974-cü ildə İsraillə Colan təpələrində döyüşləri dayandıran razılaşmaya sadiq qalırıq”- deyə Suriya lideri qeyd edib.
Əl-Şaraa həmçinin seçkilərin keçirildiyini, mülki və hərbi institutların yenidən qurulduğunu, silahlı qrupların ləğv edilərək bütün silahların dövlətin ixtiyarına verildiyini bildirib.
