BAKI, AzerVoice, Nailə Babazadə
Beynəlxalq Qırmızı Xaç Komitəsi (ICRC), İsrail ordusunun işğal planını faktiki olaraq həyata keçirməyə başladığı Qəzza şəhərindəki hərbi əməliyyatların intensivləşməsi səbəbilə bölgədəki fəaliyyətlərini müvəqqəti olaraq dayandırdığını açıqlayıb.
AzerVoice xəbər verir ki, komitənin yaydığı yazılı bəyanatda bildirilib ki, Qəzza şəhərindəki hərbi əməliyyatların şiddətlənməsi nəticəsində, ICRC-nin Qəzza şəhərində yerləşən ofisinin fəaliyyəti müvəqqəti dayandırılıb, personalın təhlükəsizliyini təmin etmək və fəaliyyətin davamlılığını qorumaq məqsədilə işçilər Qəzzanın cənubundakı digər Qızıl Xaç ofislərinə köçürülüb.
Bəyanatda həmçinin vurğulanıb ki, bu qərar Qəzzada on minlərlə insanın ağır humanitar şəraitlə qarşı-qarşıya olduğu və təcili yardıma ehtiyac duyduğu bir dövrdə verilib. Bildirilib ki, bölgədə mülki şəxslər öldürülür, məcburi köçkün salınır və insanlıqdan uzaq çətin şərtlərlə yaşamağa məcbur edilir.
“Fələstin Qızıl Aypara Cəmiyyəti və mülki müdafiə də daxil olmaqla, ilk yardım qrupları yardımı çatdırmaq üçün fasiləsiz çalışır. Lakin onların hərəkət imkanları və mülki əhaliyə təhlükəsiz şəkildə çatmaq bacarıqları ciddi şəkildə məhdudlaşdırılıb,” – deyə açıqlamada qeyd olunub.
ICRC əlavə edib ki, şərait imkan verdiyi müddətcə, Qəzza şəhərindəki mülki şəxslərə Deyr əl-Bələh və Rəfahdakı ofislər vasitəsilə yardım göstərməyə davam edəcəklər.
Qırmızı Xaç Komitəsi həmçinin vurğulayıb ki, onilliklərdir fəaliyyət göstərdikləri Qəzza şəhərinə şərait normallaşan kimi qayıtmağa sadiqdirlər.
