BAKI, AzerVoice, Nailə Babazadə
HƏMAS hərəkatı hərbi qanadı olan İzzəddin əl-Qəssam Briqadalarının atəşkəs razılaşmasının birinci mərhələsi çərçivəsində 20 israilli girovu azad edəcəyini açıqlayıb.
AzerVoice xəbər verir ki, hərəkatın yazılı bəyanatında, vasitəçi ölkələrin İsraili atəşkəs razılaşmasına riayət etməyə məcbur etməsinin vacibliyinə diqqət çəkilərək, girovların azad olunması addımı təsdiqlənib.
Bəyanata görə, Qəssam Briqadaları Qəzzada atəşkəs və girov mübadiləsi razılaşmasının birinci mərhələsi çərçivəsində əlində saxladığı 20 israilli girovu azad edəcək.
Açıqlamada bildirilib: “Hərəkat bu addımla öhdəliklərini yerinə yetirməkdə qərarlı olduğunu təsdiqləyir. HƏMAS bu addımı ilə həm də vasitəçilərin sionist düşməni razılaşmadakı öhdəliklərini yerinə yetirməyə məcbur etmək və razılaşmanın bütün maddələrinin icrasını tamamlamaq istiqamətində göstərdikləri səylərin əhəmiyyətini vurğulayır.”
Uzun illər İsrail həbsxanalarında ömürlük həbs cəzası çəkən fələstinli məhbusların azad olunmasının Qəzza zolağındakı fələstin xalqının göstərdiyi müqavimətin nəticəsi və “yeni nasistlər qarşısında boyun əyməyən güclü iradənin” göstəricisi olduğu qeyd edilib.
Bəyanatda vurğulanıb ki, İsrailin baş naziri Benyamin Netanyahu Qəzzada iki il ərzində törətdiyi soyqırım və dağıntılara baxmayaraq girovları xilas edə bilməyib və sonda fələstinli müqavimət qruplarının şərtlərini qəbul etməyə məcbur qalıb.
Netanyahunun girovları geri alma yolunun yalnız atəşkəs və girov mübadiləsi razılaşması vasitəsilə mümkün olduğunu nəhayət dərk etdiyi qeyd olunub.
“Netanyahu və ordusunun hücum cəhdlərinə baxmayaraq, fələstinli döyüşçülər israilli girovları qorumağa çalışdılar. Qəzzədəki israilli girovları qorumağımıza baxmayaraq, işğal həbsxanalarındakı fələstinli məhbuslar hər cür işgəncə və hüquq pozuntularına məruz qaldılar.” - deyə Netanyahu qeyd edib.
HƏMAS bildirib ki, İsrail həbsxanalarındakı məhbusların azad olunması Fələstin məsələsinin prioritetlərindən biri olaraq qalacaq.
HƏMAS daha əvvəl ilk mərhələdə 7 israilli girovu Beynəlxalq Qızıl Xaç Komitəsinin (ICRC) nümayəndə heyətinə təhvil vermişdi. İsrail ordusu da girovların Qızıl Xaç nümayəndələrindən təhvil alındığını açıqlamışdı.
Bildirilib ki, ICRC nümayəndə heyəti Qəzzada atəşkəs və girov mübadiləsi razılaşması çərçivəsində israilli girovların təhvil alınacağı ikinci məntəqəyə doğru yola çıxıb.
