BAKI, AzerVoice, Nailə Babazadə
HƏMAS, israilli əsirlərin cəsədlərinin təhvil verilməsinin İsrailin bölgəyə xilasetmə avadanlıqlarının girişinə icazə verməməsi səbəbindən gecikdiyini açıqlayıb.
AzerVoice xəbər verir ki, bu barədə HƏMAS-ın yaydığı bəyanatda bildirilib.
“İsrailli əsirlərə aid bəzi cəsədlər işğalçı İsrailin bombardmanları nəticəsində dağılan tunellər və binaların dağıntıları altında qalıb. Gecikmə, İsrailin Qəzzaya xilasetmə avadanlıqlarının daxil olmasına maneə yaratmasından irəli gəlir.” - deyə bəyanətdə qeyd edilir.
HƏMAS əldə edə bildiyi bütün cəsədlərin təhvil verildiyini, lakin qalanların çıxarılması üçün tələb olunan texniki vasitə və avadanlıqların hələ də təmin olunmadığını bildirib.
“Bu gecikməyə görə bütün məsuliyyət İsrail hökumətinə aiddir,” – deyə bəyanatda vurğulanıb.
HƏMAS sözçüsü Hazim Qasım isə beynəlxalq ictimaiyyəti ikili standartda ittiham edib. O, bəzi israilli əsgərlərin cəsədlərinə göstərilən həssaslığın Qəzzada dağıntılar altında qalan on minlərlə fələstinli cəsədinə göstərilmədiyini qeyd edib.
Qəzza Səhiyyə Nazirliyi açıqlayıb ki, İsrail indiyə qədər 120 fələstinli cəsədini təhvil verib, lakin onların hamısı kimliksiz şəkildə gətirilib və şəxsiyyətin müəyyənləşdirilməsi ilkin üsullarla aparılır.
Xilasetmə qrupları ağır avadanlıq çatışmazlığı səbəbindən hələ də yüzlərlə cəsədə çata bilmir. Məlumatlara görə, İsrailin Qəzza zolağına qarşı iki ildir davam edən hücumları nəticəsində bölgənin infrastruktur və xilasetmə imkanları demək olar ki, tamamilə məhv edilib.
HAMAS, Netanyahu hökumətini razılaşmanı gecikdirməkdə, Rəfah sərhəd-keçid məntəqəsini bağlı saxlamaqda və humanitar yardımların girişini məhdudlaşdırmaqda ittiham edir.
Qəzza hökumətinə bağlı Media Ofisinin məlumatına əsasən, atəşkəs qüvvəyə mindikdən sonra İsrail cəmi 653 yardım yük avtomobilinin keçidinə icazə verib. Halbuki razılaşmaya görə, hər gün 600 yardım maşınının – yanacaq və ərzaq da daxil olmaqla – Qəzzaya çatması nəzərdə tutulurdu.
İsrailin 2023-cü il oktyabrın 8-də başladığı hücumlar nəticəsində, əksəriyyəti qadın və uşaq olmaqla, 67 min 967 fələstinli həlak olub, 170 min 179 nəfər isə yaralanıb.
