BAKI,AzerVoice
ABŞ-ın Suriyaya xüsusi nümayəndəsi Tom Barak “X” (keçmiş Twitter) sosial platformasında Dəməşq və beynəlxalq koalisiyanın Dəməşq əyalətinin əl-Dumeyr bölgəsində keçirdiyi birgə əməliyyatla bağlı paylaşım edərək yazıb: “Suriya yenidən bizim tərəfimizdədir.”
Suriya Daxili İşlər Nazirliyi bildirib ki, Dəməşq əyalətinin şimal bölgələrindən birində fəaliyyət göstərən “İŞİD”-ə mənsub terrorçu hüceyrə məhv edilib. Əməliyyat ümumi təhlükəsizlik idarəsi tərəfindən əyalətin daxili təhlükəsizlik qüvvələrinin komandanlığı ilə əməkdaşlıqda həyata keçirilib. Nəticədə, bir terrorçu saxlanılıb, iki nəfər isə zərərsizləşdirilib, həmçinin silah və sursat anbarı ələ keçirilib.
Nazirliyin “Telegram” kanalında dərc etdiyi açıqlamaya əsasən, əməliyyat dərin sahə müşahidəsi və hüceyrənin hərəkətlərinin davamlı izlənməsi nəticəsində həyata keçirilib. Əməliyyat “İŞİD” terror təşkilatına mənsub silahlı qrupun tam şəkildə zərərsizləşdirilməsi ilə nəticələnib: bir nəfər tutulub, iki nəfər məhv edilib. Məlumata görə, onlardan biri toqquşma zamanı özünü partlatmağa cəhd göstərib, lakin bu, qarşısı alınaraq boşaldılmış kəmərli partlayıcı ələ keçirilib.
Nazirlik həmçinin saxlanılan şəxsin istintaq üçün səlahiyyətli orqanlara təhvil verildiyini, onun barəsində qanunlara uyğun tədbirlərin görüləcəyini qeyd edib. Əldə olunan silahlar və sursatlar müsadirə edilib.
Daxili İşlər Nazirliyinin bəyanatında vurğulanıb ki, bu əməliyyat terrorizmlə mübarizədə qabaqlayıcı strategiyanın bir hissəsidir və ölkənin təhlükəsizlik qüvvələrinin yüksək hazırlıq və peşəkarlıq səviyyəsini nümayiş etdirir.
Qeyd edək ki, beynəlxalq koalisiya Suriya Müdafiə və Daxili İşlər Nazirlikləri ilə əməkdaşlıq çərçivəsində bu ilin iyul ayında Hələb əyalətinin şərqində yerləşən əl-Bab şəhərində hava-desant və hücum əməliyyatı həyata keçirmişdi. Həmin əməliyyat nəticəsində dörd terrorçu məhv edilmiş, “İŞİD”in iraqlı liderlərindən biri və bir neçə nəfər köməkçisi həbs olunmuşdu.
Sosial şəbəkələrdə yayılan videolarda Daxili İşlər və Müdafiə Nazirliklərinə məxsus hərbi texnikanın səhər tezdən şəhərə daxil olduğu və əməliyyatın böyük dəqiqliklə aparıldığı görünür.
Avqust ayında Suriya təhlükəsizlik mənbələri məlumat verib ki, beynəlxalq koalisiya İdlib əyalətinin şimalındakı Atme qəsəbəsində hava-desant əməliyyatı keçirib. Əməliyyat zamanı “İŞİD”in yüksək rütbəli iraqlı liderlərindən biri öldürülüb.
Mənbələrin bildirdiyinə görə, hədəf alınan ev Atme sakini Əhməd Mustafa əl-Şeyxə məxsus olub. Əməliyyatın əsas hədəfi isə “İŞİD”-in “İraq vilayəti” strukturunda fəaliyyət göstərən və təşkilatın Suriyadakı hüceyrələrini əlaqələndirən iraqlı lider Salah Numan idi.
