BAKI, AzerVoice, Nailə Babazadə
İsrail ordusunun atəşkəsə baxmayaraq son 24 saatda Qəzzada həyata keçirdiyi hücumlarda 45 nəfər həlak olub.
AzerVoice xəbər verir ki, Qəzzadaki Səhiyyə Nazirliyinin yaydığı yazılı açıqlamada, İsrailin hücumları nəticəsində baş verən insan tələfatı, yaralılar və dağıntılar altından çıxarılan cəsədlərlə bağlı məlumatlar paylaşılıb.
Son 24 saat ərzində Qəzza zolağındakı xəstəxanalara, dağıntılar altından çıxarılan 12 nəfər də daxil olmaqla, ümumilikdə 57 meyit və 158 yaralı gətirilib.
Açıqlamada bildirilib ki, atəşkəsə baxmayaraq son bir gündə mülki şəxsləri hədəf alan hücumlarda 45 nəfər həyatını itirib, 158 nəfər yaralanıb.
İsrailin 8 oktyabr 2023-cü ildə Qəzza zolağına başladığı hücumlar nəticəsində ölənlərin sayı 68 min 216, yaralıların sayı isə 170 min 361 nəfərə çatıb.
Məlumatda o da qeyd olunub ki, Qəzzada son atəşkəs razılaşmasının qüvvəyə mindiyi gündən bəri davam edən İsrail hücumlarında ölən fələstinlilərin sayı 80, yaralıların sayı isə 303 nəfərə yüksəlib, atəşkəsdən sonra dağıntılar altından 426 cəsəd çıxarılıb.
Qəzza zolağında dağıntılar altında hələ də minlərlə cəsədin olduğu bildirilir.
Qeyd edək ki, ABŞ prezidenti Donald Tramp 9 oktyabrda Misirdə aparılan danışıqlarda İsrail və Həmasın Qəzzada atəşkəs planının ilk mərhələsini təsdiqlədiyini açıqlamışdı.
Misirdə aparılan danışıqlar zamanı imzalanan razılaşma İsrail hökumətinin təsdiqindən sonra 10 oktyabrda qüvvəyə minib.
Razılaşmaya əsasən, İsrail ordusu “sarı xətt”dən geri çəkildikdən sonra Qəzza zolağında atəşkəs həmin gün saat 12:00-da qüvvəyə minib.
Buna baxmayaraq, İsrail ordusu Qəzza zolağında əldə olunan atəşkəsə rəğmən, müxtəlif bəhanələrlə fələstinlilərə qarşı hücumlarını fasilələrlə davam etdirir.
