BAKI, AzerVoice, Nailə Babazadə
İsrailin nəqliyyat və rabitə naziri Miri Reqev, HƏMAS-ın Qəzzadakı keçmiş lideri Yəhya Sinvarın cəsədinin yandırılmasını təklif edib.
AzerVoice xəbər verir ki, nazir bu fikri hökumətin təhlükəsizlik kabinetinin son iclasında səsləndirərək bildirib ki, “bəzən elə simvollar olur ki, onların geri qaytarılması yolverilməzdir.”
Reqev iclasda ABŞ-ın 2011-ci ildə “Əl-Qaidə” lideri Üsama bin Ladeni öldürüb cəsədini dənizə atmasına istinad edərək deyib: “Mən təklif etdim ki, biz də Sinvara, Bin Ladenlə amerikalıların etdiyini edək.”
Yedioth Ahronoth qəzetinin məlumatına görə, Miri Reqevin təklifi hazırda İsrailin təhlükəsizlik orqanları tərəfindən dəyərləndirilir.
Sinvarın ölümü
HƏMAS-ın keçmiş Qəzza lideri Yəhya Sinvar 2024-cü ilin 16 oktyabrında İsrail ordusunun Qəzza müharibəsi çərçivəsində Rəfah şəhərində keçirdiyi əməliyyat zamanı təsadüf nəticəsində öldürülüb. O, 7 oktyabr hücumlarından sonra İsrailin bir nömrəli axtarılan şəxsi sayılırdı.
Sinvarın kimliyi diş qeydləri və DNT testləri vasitəsilə təsdiqlənib. İsrail rəsmiləri onun ölümünü əməliyyatdan qısa müddət sonra rəsmi şəkildə açıqlayıb.
HƏMAS-ın nümayəndələri Misirin Şarm əl-Şeyx şəhərində keçirilən son əsir mübadiləsi və atəşkəs danışıqları zamanı İsraildən Yəhya və Məhəmməd Sinvar qardaşlarının cəsədlərinin təhvil verilməsini tələb etmişdi. Lakin İsrail bu tələbi qəti şəkildə rədd edib.
