BAKI, AzerVoice, Nailə Babazadə
İsrail qüvvələri Suriya cənubundakı Qüneytara vilayətinin Əlcərf, Məşirfə və Um Batinə kəndlərinə daxil olaraq bir sıra evləri mühasirəyə alıb və axtarış aparıb.
AzerVoice xəbər verir ki, Suriya rəsmi xəbər agentliyi SANA bildirir ki, dörd hərbi maşın və iki tankdan ibarət İsrail patrulu Ədnaniyyə məntəqəsindən çıxaraq Məşirfə kəndi üzərindən Əlcərfə doğru hərəkət edib. Patrul Məşirfədə dayanaraq bir neçə evdə axtarış aparıb.
Agentliyin məlumatına görə, İsrailə məxsus digər hərbi karvan - yeddi zirehli maşın və iki tank - Um Batınə kəndinə daxil olub və kəndin qərbində yerləşən bir evi mühasirəyə alıb. Hadisənin səbəbləri və məqsədi barədə məlumat verilməyib.
SANA-nın məlumatına əsasən, ötən ilin dekabrında Bəşər Əsəd rejiminin çökməsindən sonra İsrail Suriya ordusuna məxsus bir sıra hərbi obyektləri hədəfə alaraq onların məhv edilməsini və yenidən bərpasının qarşısını almağı məqsəd qoyub. Bununla yanaşı, İsrail qüvvələri Dəməşq, Qüneytara və Dəraa əyalətlərinin kənd ərazilərində quru əməliyyatları həyata keçirib, Suriya-İsrail sərhəddindəki bufer zonaya nəzarəti ələ alıb və sərhəd bölgələrində basqınlar zamanı bir sıra şəxsləri saxlayıb.
