BAKI, AzerVoice, Nailə Babazadə
BMT-nin Beynəlxalq Uşaqlara Yardım Fondu (UNICEF) sözçüsü Rikardo Pires bildirib ki, 11 oktyabrda atəşkəsin qüvvəyə minməsinə baxmayaraq, İsrailin hücumlarında Qəzzada hər gün ortalama 2 uşaq həyatını itirib.
AzerVoice xəbər verir ki, Pires Cenevrədəki BMT ofisində keçirilən həftəlik mətbuat konfransında açıqlama verib.
O, dünən Qəzza şəhərinin cənubundakı Xan Yunus bölgəsində İsrailin hava hücumunda bir qız uşağının, əvvəlki gün isə Qəzza şəhərində 7 uşağın öldüyünü xatırladıb.
“11 oktyabrdan bəri Qəzza Zolağında (İsrailin hücumları nəticəsində) minimum 67 uşaq ölüb, onlarcası isə yaralanıb. Bu, hər gün təxminən 2 uşağın öldüyü anlamına gəlir,” – deyə Pires bildirib.
O, vurğulayıb ki, bu rəqəmlər sadəcə statistik deyil, hər bir uşağın ailəsi, arzusu və gələcəyi var.
Pires qeyd edib ki, Qəzzalı uşaqlara amansız bir reallıq yaşadılır.
“Onlar üçün təhlükəsiz yer yoxdur və dünya onların ağrılarını adi qəbul etməyə davam edə bilməz.” - deyə Pires qeyd edib.
UNICEF-in Qəzzada genişmiqyaslı müdaxilələr etdiyini, lakin bunun hələ də kifayət etmədiyini bildirib.
“Yardım və lazım olan dəstək daha sürətli çatsaydı, daha çox şey edə bilərdik.” - deyə Pires əlavə edib.
O, xüsusilə çadırlarda yaşayan və sərt qış şəraitinə məruz qalan yüz minlərlə uşağın olduğunu diqqətə çatdırıb. Pires Qəzzalı uşaqların gecələr istilik, izolyasiya və yorğan olmadan üşüdüklərini vurğulayıb.
Sual üzərinə UNICEF sözçüsü Pires İsrail ordusunun Qəzza Zolağında hava hücumlarını həyata keçirdiyini təsdiqləyib.
