BAKI, AzerVoice, Nailə Babazadə
Atəşkəsə baxmayaraq Qəzza şəhərinin şərqindəki yaşayış binalarını partladaraq dağıdan İsrail ordusu, Xan Yunis şəhərinin şərq bölgələrinə də hücum həyata keçirib.
AzerVoice xəbər verir ki, şahidlərinin verdiyi məlumata görə, İsrail ordusu Qəzza şəhərinin şərqində yerləşən Şucaiyyə məhəlləsində işğal etdiyi ərazilərdə çox sayda binanı partladaraq yerlə-yeksan edib.
İsrail əsgərləri həmçinin Qəzza zolağının cənubunda yerləşən Xan Yunisin şərq bölgələrini artilleriya atəşi ilə bombalayıb.
İsrail ordusunun hücumları nəticəsində həlak olan və ya yaralananların olub-olmadığı barədə hələlik məlumat verilməyib.
ABŞ Prezidenti Donald Tramp 9 oktyabrda Misirdə davam edən danışıqlarda İsrail və Həmasın Qəzzədə atəşkəs planının ilk mərhələsini təsdiqlədiyini açıqlamışdı.
Misirdə aparılan danışıqlar nəticəsində əldə olunan razılaşma imzalanarkən atəşkəs İsrail hökumətinin təsdiqi ilə 10 oktyabrda qüvvəyə minmişdi.
Buna baxmayaraq, İsrail ordusu Qəzza zolağında əldə olunan atəşkəsi pozaraq müxtəlif iddialar altında fələstinlilərə qarşı hücumlarını davam etdirir.
