BAKI, AzerVoice, Orxan Qədirzadə
İraqın şimalında, Ərbil şəhərinə aparan yol üzərində yerləşən Lanaz Neft Emalı Zavodunun qarşısında keçirilən etiraz aksiyası zamanı Kürd təhlükəsizlik qüvvələrinin açdığı atəş nəticəsində iki nəfər ölüb, üç nəfər yaralanıb. AzerVoice xəbər verir ki, bu barədə kütləvi informasiya mənbələri məlumat yayıb.
Mənbələrin bildirdiyinə görə, etirazçılar zavodda iş imkanlarının yaradılmasını tələb ediblər. Aksiyanın gedişində obyektin mühafizəsinə cəlb olunan təhlükəsizlik qüvvələri etirazçılara qarşı silahdan istifadə edib. İlkin məlumatlara əsasən, öldürülənlərdən biri etirazçı, digəri isə neft məhsulları daşıyan yük maşınının sürücüsü olub.
Yaralıların xəstəxanaya yerləşdirildiyi və vəziyyətlərinin dəyişkən olduğunu bildirilir. Hadisə ilə bağlı rəsmi hələlik açıqlama verilməyib. Baş verən insident araşdırılır.
Son illərdə İraqın neft sektorunda işsizlik və sosial təminatla bağlı narazılıqlar müxtəlif bölgələrdə etirazların artmasına səbəb olub. Kürd regionunda yerləşən sənaye obyektlərinin mühafizə qüvvələri ilə sakinlər arasında gərginlik bir neçə dəfə ciddi qarşıdurmalarla nəticələnib.
