BAKI,AzerVoice, Orxan Qədirzadə
İsrail ordusu cənubi Livanda Hizbullahın mövqelərinə qarşı yeni hava zərbələri həyata keçirib. Hücumlar Livan və İsrailin mülki nümayəndələrinin onilliklərdən sonra ilk dəfə birbaşa danışıqlar aparmasından cəmi bir gün sonra baş verib.
AzerVoice xəbər verir ki, 2024-cü ilin noyabrında əldə olunmuş atəşkəsə baxmayaraq, İsrail Livanın cənubundakı beş strateji bölgədə hərbi mövcudluğunu saxlayır və Hizbullahın “hərbi infrastrukturu” adlandırdığı obyektləri hədəfə almaqda davam edir.
Papa XIV Leonun bazar günündən çərşənbə axşamına qədər Livana səfəri zamanı hücumlar qısamüddətli olaraq səngimiş, pontifik tərəfləri gərginliyə son verməyə çağırmışdı.
İsrail ordusu bəyan edib ki, “cənubi Livanda Hizbullahın hədəflərinə qarşı zərbələr endirməyə başlanılıb”. Bundan əvvəl ordu Mahrouna və Cbaa yaşayış məntəqələrindəki binalara zərbələr endiriləcəyinə dair xəbərdarlıq yaymışdı.
Daha sonra İsrail ordusu Məcdəl və Baraşit bölgələrində Hizbullahın “hərbi infrastrukturu”nun vurulacağı barədə əlavə xəbərdarlıqlar edib.
Livanın Milli Xəbər Agentliyi bildirib ki, İsrail aviasiyası Mahrouna üzərinə hava zərbəsi endirib, digər hücumlar isə Cbaa, Məcdəl və Baraşitdə qeydə alınıb.
Çərşənbə günü BMT-nin sülhməramlı missiyasının qərargahı yerləşən Naqura şəhərində Livan və İsrailin mülki nümayəndələri arasında gözlənilməz görüş keçirilib. Bu görüş atəşkəsin monitorinq mexanizmi çərçivəsində baş tutub və ABŞ, Fransa, Livan, İsrail və BMT təmsilçilərinin iştirakı ilə gerçəkləşib.
Livan və İsrail 1948-ci ildən bəri rəsmi olaraq müharibə vəziyyətindədir. Livanın Baş naziri Nəvaf Salam bildirib ki, bu görüş “sülh danışıqları” kimi qiymətləndirilməməli, yalnız atəşkəsin tam icrasına yönəlib.
Salam deyib ki, danışıqlar düşmənçiliklərin tam dayandırılması, Livanlı girovların azad olunması, İsrail qoşunlarının Livan ərazisindən tam çıxması məsələlərini əhatə edir.
ABŞ Livanı Hizbullahın tərksilahını sürətləndirməyə çağırır və iki ölkə arasında birbaşa dialoqu dəstəkləyir.
İsrailin Baş naziri Benyamin Netanyahunun ofisi bildirib ki, Naqura danışıqlarında “müsbət atmosfer” müşahidə olunub və tərəflər potensial iqtisadi əməkdaşlıq imkanlarını müzakirə ediblər. Bununla belə, İsrail vurğulayıb ki, Hizbullahın tərksilahı hər hansı irəliləyişdən asılı olmayaraq “əsas şərt” olaraq qalır.
ABŞ səfirliyinin məlumatına görə, görüşdə ABŞ nümayəndəsi Morqan Ortaqus da iştirak edib. O, bir gün əvvəl Qüdsdə Benyamin Netanyahu və İsrailin xarici işlər naziri Gideon Saar ilə görüşmüşdü.
