BAKI, AzerVoice, Orxan Qədirzadə
İsrail 2026-cı il müdafiə büdcəsini 112 milyard şekel (34,6 milyard dollar) olaraq təsdiqləyib. AzerVoice xəbər verir ki, bu məbləğ əvvəlki layihədə nəzərdə tutulan 90 milyard şekeli xeyli üstələyir.
Müdafiə naziri İsrail Kats və maliyyə naziri Bezalel Smotriç büdcə çərçivəsi ilə bağlı razılığa gəlib. Nazirlər Kabineti gələn ilin büdcəsinin müzakirəsinə başlayıb və sənəd martadək təsdiqlənməsə, ölkədə növbədənkənar seçkilər keçirilə bilər.
Büdcə müzakirələri cümə axşamı gec saatlaradək davam edib, ilkin səsvermənin bu gün keçiriləcəyi gözlənilir. Təsdiq olunacağı halda büdcə parlamentə göndəriləcək.
Kats bildirib ki, ordu döyüşçülərin ehtiyaclarını qarşılamağa və ehtiyat qüvvələrin üzərindəki yükü azaltmağa davam edəcək. “İDF-i gücləndirməyə və döyüşçülərin bütün ehtiyaclarını qarşılamağa davam edəcəyik. Bu, İsrailin hər cəbhədə təhlükəsizliyini təmin etmək üçün vacibdir.”-o deyib.
Qəzza müharibəsi İsrailə baha başa gəlib. Ölkə təkcə 2024-cü ildə HƏMAS və Hizbullahla döyüşlərə 31 milyard dollar sərf edib.
Smotriç bildirib ki, 2026-cı il müdafiə büdcəsi müharibədən əvvəl — 2023-cü illə müqayisədə 47 milyard şekel çoxdur. “Bu il ordunu gücləndirmək üçün böyük büdcə ayırırıq, ancaq elə bir plan hazırlamışıq ki, ölkə yenidən iqtisadi artım yoluna qayıda bilsin.”-Smotriç deyib.
