BAKI, AzerVoice, Orxan Qədirzadə
İsrail Baş naziri Benyamin Netanyahu dekabrın 29-da ABŞ Prezidenti Donald Tramp ilə Qəzza atəşkəsi planının növbəti mərhələlərini müzakirə edəcək.
AzerVoice xəbər verir ki, bu barədə İsrail hökumətinin sözçüsü Şoş Bedrosian jurnalistlərə onlayn brifinq zamanı məlumat verib.
İsrail və HƏMAS arasında oktyabr ayında əldə edilən atəşkəs tərəflərin qarşılıqlı ittihamları fonunda həssas olaraq qalır.
Trampın planında hələ razılaşdırılmamış bir sıra əsas məsələlər qalmaqdadır. HƏMAS-ın silahsızlaşdırılması, müharibədən sonrakı Qəzzanın idarə olunması, həmçinin anklavda fəaliyyət göstərəcək beynəlxalq təhlükəsizlik qüvvəsinin tərkibi və mandatı razılaşdırılmamış olaraq qalır.
Hökumət rəsmisi Bedrosian deyib ki, “Baş nazir 29 dekabrda Prezident Tramp ilə görüşəcək. Tərəflər atəşkəs planının gələcək addımlarını, mərhələlərini və beynəlxalq sabitləşdirmə qüvvəsinin formalaşdırılmasını müzakirə edəcəklər.”
Netanyahunun ofisi dekabrın 1-də Trampın onu Ağ Evə dəvət etdiyini açıqlamışdı. İsrail mediası isə liderlərin Floridada da görüşə biləcəyini bildirib.
