BAKI, AzerVoice, Orxan Qədirzadə
İsrail ordusu Livanda fəaliyyət göstərən “Hizbullah” təşkilatının dənizlə bağlı gizli fəaliyyətlərinə dair yeni iddialar səsləndirib. İsrail tərəfinin açıqlamasına görə, təxminən bir il əvvəl saxlanılaraq İsrailə aparılan İmad Əmhez istintaq zamanı təşkilatın dəniz layihəsi ilə bağlı mühüm məlumatlar verib.
İsrail ordusunun ərəbcə rəsmi nümayəndəsi Aviçay Adraei sosial şəbəkədə yaydığı açıqlamada bildirib ki, əməliyyat İsrail Hərbi-Dəniz Qüvvələrinin xüsusi bölməsi tərəfindən, hərbi kəşfiyyatın dəniz bölməsinin yönləndirməsi ilə Livanın şimalındakı Bətrun şəhərində həyata keçirilib. Onun sözlərinə görə, saxlanılma Livan–İsrail sərhədindən təxminən 140 kilometr aralıda baş verib.
Açıqlamada qeyd olunur ki, İmad Əmhez İran və Livanda hərbi hazırlıq keçib və “Hizbullah”ın sahilyanı raket bölməsində fəaliyyəti çərçivəsində dəniz sahəsində geniş təcrübə əldə edib. İsrail ordusu həmçinin onun Livandakı mülki dənizçilik akademiyalarından birində təhsil aldığını iddia edərək, bunu təşkilatın mülki strukturlardan istifadəsinə nümunə kimi təqdim edib.
İsrail tərəfinin bildirdiyinə görə, istintaq zamanı Əmhez “Hizbullah”ın dəniz fəaliyyəti ilə bağlı ən məxfi layihələrdən birində mühüm rol oynadığını etiraf edib. Verilən məlumatların, dəniz fəaliyyətlərinin mülki örtük altında təşkili və mümkün hücum planları ilə bağlı olduğu iddia olunur.
Açıqlamada həmçinin qeyd edilib ki, İsrail ordusunun iddiasına əsasən, sözügedən dəniz layihəsi təşkilatın rəhbərliyi tərəfindən idarə olunub və bu istiqamətdə bir neçə yüksək vəzifəli şəxsin prosesdə iştirak etdiyi bildirilir. İsrail tərəfi təqdim edilən məlumatlar əsasında layihənin irəliləyişinin dayandırıldığını vurğulayıb.
İsrail ordusu “Hizbullah”ın dənizlə bağlı fəaliyyətlərinin İranın maddi və ideoloji dəstəyi ilə inkişaf etdirildiyini iddia edərək, bu vəsaitlərin Livanın sosial-iqtisadi inkişafına deyil, hərbi fəaliyyətlərə yönəldildiyini bildirib. Açıqlamada İsrailin təhlükəsizlik riskləri gördüyü istiqamətlərdə tədbirlərin davam etdiriləcəyi qeyd olunub.
