BAKI, AzerVoice, Orxan Qədirzadə
Səudiyyə Ərəbistanı İsrailin Somaliland regionunu müstəqil dövlət kimi tanımasına münasibət bildirərək, Somali Federativ Respublikasının suverenliyinə, birliyinə və ərazi bütövlüyünə tam dəstəyini ifadə edib.
AzerVoice xəbər verir ki, Səudiyyə Ərəbistanının rəsmi mövqeyi Krallığın dövlət xəbər agentliyi vasitəsilə açıqlanıb. Bildirilib ki, Riyad İsrail ilə Somaliland arasında qarşılıqlı tanınma ilə bağlı elan edilmiş qərarı qəbul etmir və bu addımı Somali dövlətinin birliyinə zidd hesab edir.
Açıqlamada vurğulanıb ki, Səudiyyə Ərəbistanı Somalinin vahidliyinə zidd olan və paralel siyasi qurumların yaradılmasına yönəlmiş istənilən cəhdləri rədd edir. Krallıq Somali dövlətinin legitim institutlarını dəstəklədiyini və Somali xalqının təhlükəsizliyi və sabitliyinin qorunmasına xüsusi önəm verdiyini bildirib.
Eyni zamanda qeyd olunub ki, Səudiyyə Ərəbistanı Somali xalqının milli maraqlarının müdafiəsi və ölkədə sabitliyin təmin edilməsi istiqamətində səylərin davam etdirilməsinin tərəfdarıdır.
Xatırladaq ki, İsrail bu gün Somaliland regionunu “müstəqil və suveren dövlət” kimi tanıdığını açıqlayıb və tərəflər arasında diplomatik münasibətlərin qurulmasına dair razılaşma imzalanıb. Bununla da İsrail Somalilandı rəsmi şəkildə tanıyan ilk dövlət olub.
Somaliland 1991-ci ildə Somalidən birtərəfli qaydada ayrıldığını elan etsə də, indiyədək beynəlxalq ictimaiyyət tərəfindən müstəqil dövlət kimi tanınmayıb. Regionun hazırkı rəhbəri Əbdürrəhman Məhəmməd Abdullahi vəzifəyə gəldikdən sonra beynəlxalq tanınma məsələsini əsas prioritet kimi irəli sürüb.
