BAKI, AzerVoice, Nailə Babazadə
Səudiyyə Ərəbistanının xarici işlər naziri Feysəl bin Fərhan bazar günü axşam saatlarında rəsmi səfər çərçivəsində Qahirəyə gedib. Səfər Səudiyyə Ərəbistanı ilə Misir arasında siyasi dialoqun intensivləşməsi fonunda baş tutur.
AzerVoice xəbər verir ki, nazir bazar ertəsi ( bu gün) Misirin dövlət başçısı Əbdülfəttah əs-Sisi ilə görüşəcək. Eyni zamanda, Misirin xarici işlər naziri Bədr Abdelatti ilə ikitərəfli danışıqlar planlaşdırılır.
Görüşlərin gündəliyində Səudiyyə–Misir münasibətlərinin müxtəlif istiqamətlər üzrə daha da gücləndirilməsi məsələləri yer alır. Tərəflərin enerji, ticarət, investisiya, nəqliyyat və təhlükəsizlik sahələrində əməkdaşlığın genişləndirilməsi imkanlarını müzakirə edəcəyi gözlənilir. Xüsusilə iqtisadi tərəfdaşlığın dərinləşdirilməsi, birgə investisiya layihələri və regional nəqliyyat-logistika əlaqələri diqqət mərkəzində olacaq.
Bununla yanaşı, danışıqlarda Yaxın Şərqdə mövcud vəziyyət, regional təhlükəsizlik məsələləri və beynəlxalq gündəmdəki aktual proseslərə dair fikir mübadiləsi aparılması nəzərdə tutulur. Mənbələrin bildirdiyinə görə, Qəzza ətrafında humanitar vəziyyət, Qırmızı dənizdə təhlükəsizlik və ərəb dünyasında koordinasiyanın gücləndirilməsi də müzakirə mövzuları sırasında olacaq.
Qeyd edək ki, Səudiyyə Ərəbistanı və Misir regionun aparıcı dövlətləri kimi ərəb dünyasında siyasi sabitliyin qorunması və ortaq mövqelərin formalaşdırılması istiqamətində sıx əməkdaşlıq edirlər. Feysəl bin Fərhanın Qahirəyə səfəri bu strateji tərəfdaşlığın davamı və iki ölkə arasında əlaqələrin daha da möhkəmləndirilməsi baxımından mühüm əhəmiyyət daşıyır.
