BAKI, AzerVoice, Nailə Babazadə
İsrail ordusu əldə olunmuş atəşkəs razılaşmasına məhəl qoymayaraq, Qəzza zolağının müxtəlif nöqtələrinə artilleriya və hava zərbələri endirməkdə davam edir.
AzerVoice xəbər verir ki, yerli mənbələrdən alınan məlumata görə, İsrail ordusuna məxsus hərbi texnikalar Qəzzanın cənubundakı Xan Yunis şəhərinin şərq hissəsini atəşə tutub. Eyni zamanda, Rəfah şəhərinin qərbində yerləşən Mevasi bölgəsinin cənub hissəsi də artilleriya atəşinə məruz qalıb.
İsrail hərbi təyyarələri Qəzza şəhərinin şərqindəki Tuffah məhəlləsinə şiddətli hava zərbələri endirib. Şəhərin şərq hissəsi artilleriya atəşi ilə hədəf alınarkən, mərkəzi hissədə yerləşən Meqazi qaçqın düşərgəsinin şərqinə də hücumlar təşkil edilib.
Məlumata görə, 10 oktyabr 2025-ci ildə atəşkəsin qüvvəyə minməsindən bu yana İsrailin hücumları nəticəsində 442 fələstinli həyatını itirib, 1236 nəfər isə yaralanıb. Hazırda İsrail Qəzzaya qida, tibbi ləvazimat və sığınacaq ehtiyaclarının girişini ciddi şəkildə məhdudlaşdırır. Nəticədə təxminən 2,4 milyon fələstinli ağır humanitar şəraitdə yaşam mübarizəsi aparır.
Qeyd edək ki, 8 oktyabr 2023-cü ildən bəri İsrailin Qəzzaya hücumları nəticəsində əksəriyyəti qadın və uşaq olmaqla 71 mindən çox fələstinli həyatını itirib, 171 mindən çox insan yaralanıb. Bölgədəki mülki infrastrukturun isə təxminən 90 faizi tamamilə məhv edilib.
