BAKI, AzerVoice, Nailə Babazadə
Qəzza zolağının cənubunda yerləşən Xan Yunis şəhərinin şərq hissəsində onlarla fələstinli ailə İsrail ordusu tərəfindən evlərini tərk etməyə məcbur edilib. Sakinlərin və HƏMAS rəsmilərinin verdiyi məlumata görə, bu, ötən ilin oktyabr ayında əldə olunmuş atəşkəs razılaşmasından bəri həyata keçirilən ilk məcburi təxliyə əmridir.
AzerVoice xəbər verir ki, Bani Suheyla qəsəbəsinin Əl-Rəqəb məhəlləsində çadır düşərgələrində yaşayan ailələrə bazar ertəsi günü havadan vərəqələr atılıb. Ərəb, ivrit və ingilis dillərində yazılmış xəbərdarlıqlarda ərazinin İsrail ordusunun nəzarəti altında olduğu və sakinlərin dərhal bölgəni tərk etməli olduqları bildirilib. İsrail ordusu hələlik mövzu ilə bağlı rəsmi şərh verməyib.
Atəşkəs razılaşmasının birinci mərhələsi çərçivəsində irimiqyaslı döyüşlər dayandırılsa da, növbəti mərhələlər üzrə tərəflər arasında ciddi fikir ayrılıqları davam edir. Bani Suheyla sakini Mahmudun bildirdiyinə görə, İsrail ordusu atəşkəsdən sonra müəyyən edilmiş geri çəkilmə xəttini (sarı xətt) hər dəfə 120-150 metr fələstinlilərin nəzarətindəki ərazilərə doğru irəli çəkir. Bu addım nəticəsində ən azı 70 ailənin yenidən qərb istiqamətinə köçmək məcburiyyətində qaldığı qeyd edilir.
Həmasın Qəzzadakı media ofisinin direktoru İsmayıl əl-Səvabta İsrail ordusunun Xan Yunisin şərqində nəzarət zonasını genişləndirməsi nəticəsində indiyədək 9 minə yaxın insanın didərgin düşdüyünü vurğulayıb. Səvabta bildirib ki, 19 yanvar 2026-cı il tarixində paylanılan yeni vərəqələr daha 3 min insana təsir edib və bu, artıq məhdud olan sığınacaq sahələrindəki humanitar böhranı daha da dərinləşdirib.
ABŞ Prezidenti Donald Trampın vasitəçiliyi ilə hazırlanan planın növbəti mərhələlərində Həmasın tərksilah edilməsi, İsrailin ərazilərdən tamamilə çəkilməsi və beynəlxalq dəstəkli yeni bir administrasiyanın qurulması nəzərdə tutulur. Lakin atəşkəs qüvvəyə mindiyi gündən bəri baş verən qarşıdurmalarda 460-dan çox fələstinli və 3 İsrail əsgəri həlak olub. 2023-cü ilin oktyabrında başlayan genişmiqyaslı müharibə nəticəsində isə Qəzzada ümumi can itkisinin 71 minə çatdığı bildirilir.
