BAKI, AzerVoice, Nailə Babazadə
İsrail ordusu atəşkəs razılaşmasına baxmayaraq, Qəzza zolağının müxtəlif bölgələrinə intensiv hücumlar təşkil edib. Şahidlərin verdiyi məlumata görə, İsrail qüvvələri Qəzza şəhərinin şərqini artilleriya atəşinə tutub, eyni zamanda cənubdakı Rəfah və Xan Yunis bölgələrində hərbi texnikadan nizamsız atəş açıb.
AzerVoice xəbər verir ki, son hücumlar nəticəsində yaranan tələfat barədə hələlik dəqiq məlumat verilməsə də, atəşkəs dövründəki ümumi mənzərənin kifayət qədər ağır olduğu bildirilir. Atəşkəs razılaşmasının qüvvəyə mindiyi 10 oktyabr 2025-ci il tarixindən bu yana İsrail ordusunun pozuntuları nəticəsində 477 fələstinli öldürülüb, min 301 nəfər isə yaralanıb.
İsrailin 2023-cü ilin oktyabr ayından bəri Qəzza zolağına yönəlik davam etdirdiyi genişmiqyaslı hücumların ümumi statistikası isə dəhşətli həddə çatıb. Rəsmi məlumatlara görə, münaqişənin başladığı tarixdən bu yana ümumilikdə 71 562 fələstinli həyatını itirib, 171 379 nəfər isə müxtəlif dərəcəli bədən xəsarətləri alıb.
Ekspertlər atəşkəsə baxmayaraq davam edən bu hücumların bölgədəki humanitar böhranı daha da dərinləşdirdiyini və kövrək sülh prosesini təhlükə altına atdığını vurğulayırlar.
